Turkmanistonning Belgiyadagi elchisi Sapar Palwanow Bryusseldagi qarorgohda Benilyuks Ittifoqi bosh kotibi Ariadna Petridis bilan o‘tkazilgan uchrashuv davomida Turkmaniston va Benilyuks mamlakatlari (Belgiya, Niderlandiya, Lyuksemburg) diplomatik hamda xizmat pasportlari egalarini viza talablaridan ozod qilish imkoniyatini ko‘rib chiqishni taklif qildi. Bu haqda Turkmaniston elchixonasi matbuot xizmati xabar berdi.

Uchrashuvda Turkmaniston va Yevropa Ittifoqi o‘rtasidagi hamkorlikning kengayishi, muloqotlar, siyosiy maslahatlashuvlar va mutaxassislar uchrashuvlari sonining ortishi o‘zaro tashriflar hamda rasmiy aloqalarning ko‘payishiga olib kelgani ta'kidlandi. S. Palwanowni ta'kidlashicha, diplomatik pasport egalari uchun vizalarni bekor qilish ushbu rivojlanish sur'atini qo‘llab-quvvatlashning amaliy mexanizmi bo‘lishi, shuningdek yuqori darajadagi tashriflarni tashkil etish va institutsional hamkorlikni mustahkamlashga xizmat qiladi.

Benilyuks Ittifoqi bosh kotibi tashkilotning ushbu yo‘nalishdagi tajribasi va amaldagi qoidalari haqida to‘xtalib, sekretariat vakolati doirasida ushbu masala bo‘yicha keyingi muzokaralarga ko‘maklashishga tayyorligini bildirdi.

Shuningdek, tomonlar Benilyuks va Markaziy Osiyo mamlakatlari o‘rtasida mintaqaviy hamkorlik yo‘nalishi bo‘yicha tajriba almashish imkoniyatini muhokama qildilar. Turkmaniston tomoni Benilyuksning davlatlar o‘rtasidagi muvofiqlashtirish va barqaror mintaqaviy mexanizmlar bo‘yicha ko‘p yillik tajribasiga qiziqish bildirdi. Petridis ushbu tashabbusni yuqori baholab, Belgiya, Niderlandiya va Lyuksemburg hamkorligi bugungi kunda xavfsizlik, energetika, iqlim o‘zgarishi, barqaror rivojlanish va iqtisodiyot kabi sohalarni qamrab olganini ta'kidladi.

Bundan tashqari, elchi S. Palwanow 2026-yil 4–6-sentabr kunlari Kronenberg shahridagi (Niderlandiya) «Peelbergen» ot sporti markazida bo‘lib o‘tadigan yirik xalqaro ot sporti musobaqasiga tayyorgarlik haqida axborot berib, Benilyuks Ittifoqi vakillarini unda ishtirok etishga taklif qildi.