Turkmaniston va Oʻzbekiston qishloq xoʻjaligi sohasidagi hamkorlikni muhokama qildilar

“Italiya – Markaziy Osiyo (C5) + Ozarbayjon” xalqaro forumi doirasida Turkmaniston qishloq xoʻjaligi vaziri oʻrinbosari Berkeli Berkeliyev Oʻzbekiston qishloq xoʻjaligi vaziri Ibrohim Abdurahmonov bilan uchrashuv oʻtkazdi.

Tomonlar agrar sohada ikki tomonlama hamkorlikni yanada rivojlantirish, tajriba almashish va qoʻshma loyihalarni kengaytirish istiqbollarini muhokama qildilar. Gʻoʻza urugʻchiligi sohasidagi mavjud imkoniyatlardan samarali foydalanish, uni hududlar boʻyicha taqsimlash va yuqori hosildor navlarni amaliyotga joriy etishga alohida e’tibor qaratildi. Bu haqda “Uzdaily” xabar bermoqda.

Qishloq xoʻjaligini raqamlashtirish va zamonaviy texnologiyalarni joriy etish muzokaralarning muhim yoʻnalishi boʻldi. Uchrashuv ishtirokchilari qoʻshma tashabbuslarni ilgari surish, innovatsion yechimlarni amalda qoʻllash va dehqonlarga zamonaviy agrotexnologiyalarni oʻrgatish boʻyicha fikr almashdilar.

Shuningdek, dehqonlarning malakasini oshirish boʻyicha sinov loyihalarining amalga oshirilishi hosildorlikni oshirishga va qishloq xoʻjaligining eksport imkoniyatlarini kengaytirishga sharoit yaratishi ta’kidlandi.

Muzokaralar natijasida har ikki tomon ham izchil va oʻzaro manfaatli hamkorlikni davom ettirishga, yangi qoʻshma loyihalarni hayotga tatbiq etishga va agrar sektorni zamonaviylashtirishga tayyor ekanliklarini tasdiqladilar.