Turkmaniston va Qozog‘iston Boku orqali 4 mln tonnadan ortiq neftni tranzit qildi

Boku–Tbilisi–Jayhun (BTJ) quvur liniyasi orqali 2025-yilda Turkmaniston va Qozog‘iston 4 million 122 ming 300 tonna hajmdagi neftni o‘tkazdi.

Ozarbayjon Davlat statistika qo‘mitasiga tayanib “Report.az” nashrining xabar berishicha, ushbu ko‘rsatkich tegishli neft quvuri orqali jami tashilgan hajmning 15,2 foizini tashkil etadi.

Umuman olganda, 2025-yilda Boku–Tbilisi–Jayhun quvur liniyasi orqali 27 million 179 ming 200 tonna neft tashildi.

Boku–Tbilisi–Jayhun (BTJ) quvuri 1768 kilometr masofaga cho‘zilgan. U Kaspiy dengizidan chiqariladigan xom neftni Ozarbayjon poytaxti Bokudan boshlab, Gruziya orqali Turkiyaning O‘rta yer dengizidagi Jayhun portiga yetkazib beradi.