Turkmanistonda moliyaviy hisobot ko‘rsatkichlariga o‘zgartirishlar kiritildi

Turkmaniston Moliya va Iqtisodiyot vazirligi iqtisodiy subyektlar tomonidan moliyaviy hisobot berish ko‘rsatkichlariga o‘zgartirishlar kiritilganini e’lon qildi. Moliya va iqtisodiyot vazirining tegishli buyrug‘i 2025 yil 31 dekabrda Adliya vazirligi tomonidan ro‘yxatdan o‘tkazilgan.

Xorijiy investitsiyalarga ega subyektlar oraliq va soddalashtirilgan oraliq hisobotlarni hisobot davridan keyingi oyning 20-sigacha, umumiy va soddalashtirilgan yil yakunidagi hisobotlarni esa keyingi yilning 25 yanvarigacha topshirishlari kerak.

Boshqa xorijiy investorlar uchun hisobot topshirish muddati oraliq davr yakunidan keyingi oyning 25-sanasi hisoblanadi. Umumiy va soddalashtirilgan yil yakunidagi hisobotlar keyingi yilning 25 yanvarigacha taqdim qilinishi lozim.

Ishlab chiqarish birlashmalari, uyushmalar, aksiyadorlik jamiyatlari va agentliklar konsolidatsiyalangan moliyaviy hisobotlarni oraliq davr yakunidan keyingi oyning 30-sigacha, yil yakuni hisobotlarini esa keyingi yil 1 fevralgacha topshirishlari kerak.

Markaziy va mahalliy ijro hokimiyati organlari uchun ham hisobot topshirish muddatlari belgilangan. Ushbu organlar oraliq konsolidatsiyalangan hisobotni hisobot davri tugagandan so‘ng 40 kun ichida, yil yakuni hisobotini esa keyingi yil 1 fevralgacha topshirishlari shart.

Ushbu tartib mamlakatda buxgalteriya hisobi va moliyaviy hisobot berish tizimini takomillashtirishda muhim ahamiyatga ega.