Turkmeniston BMTning Awaza forumi ishtirokchilarini kutib olmoqda

“Awaza” milliy turizm zonasi Birlashgan Millatlar Tashkilotining Dengizga chiqish imkoni bo‘lmagan rivojlanayotgan davlatlar (LLDC) bo‘yicha uchinchi konferensiyasi ishtirokchilari va boshqa mehmonlarini qabul qilmoqda. Bu haqda “Turkmenistan” gazetasi xabar bermoqda.

Forum ishtirokchilari Turkmanboshi xalqaro aeroportida turkman milliy mehmondo‘stlik an’analari asosida kutib olinmoqda. Sohilbo‘yidagi shahar va “Awaza” milliy turizm hududida bayramona muhit hukm surmoqda. Buni shahar ko‘chalaridagi bayramona bezaklar, bannerlar va kutib olish yozuvlari tasdiqlaydi.

Forum doirasida siyosiy-diplomatik, savdo-iqtisodiy va madaniy-gumanitar yo‘nalishlarda keng ko‘lamli tadbirlar o‘tkazilishi rejalashtirilgan. Ishbilarmonlar uchrashuvlari, tematik ko‘rgazmalar va Markaziy Osiyo davlatlarining Milliy kunlari tashkil etiladi.

Ushbu konferensiya 2025-yilning “Xalqaro tinchlik va ishonch yili” deb e’lon qilingani, Turkmanistonning doimiy betaraflik maqomiga 30 yil to‘lishi hamda BMT tashkil topganining 80 yilligi bilan aloqadorligi bois alohida ahamiyat kasb etadi. Bu Turkmanistonning tinchliksevarlik va xalqaro hamkorlik tamoyillariga sodiqligini namoyon etadi.

BMTning Awaza forumi maqsadi – dengizga chiqish imkoniyati bo‘lmagan rivojlanayotgan mamlakatlarga mavjud qiyinchiliklarni yengib o‘tish va o‘z imkoniyatlarini ro‘yobga chiqarishda ko‘maklashish uchun keng hamkorlik maydonini yaratish, bu borada samarali yechimlarni topishdan iborat.

Forum dasturida transport va aloqa tizimi, yoshlar siyosati, barqaror energetika, aylanuvchi iqtisodiyot kabi masalalar muhokama qilinadi. Shuningdek, madaniy-gumanitar tadbirlarga, do‘stlik konsertiga va Markaziy Osiyo mamlakatlarining Milliy kunlariga alohida e’tibor qaratiladi.