Kardiff uniwersitetiniň we Uels muzeýiniň hünärmenleri 1583-nji ýylda gark bolan söwda gämisinden tapylan sandygyň latun gulpuny açmagy başardylar. Bu barada uniwersitetiň resmi saýtyna salgylanýan «uza.uz» neşiri habar berýär.

Gulpuň sanly kody dört harpdyr: ANCE. Alym Dewid Uilýams gulpuň içki mehanizminiň üç ölçegli şekilini taýýarlap, onuň tegelek böleklerindäki nyşanlary degişli deşikler bilen deňeşdirmek arkaly gulpy açmagyň ýoluny tapdy.

Sandygy 1583-nji ýylyň 28-nji dekabrynda agşam Ispaniýa tarap ýüzüp barýarka heläkçilige uçran «Ann Francis» atly söwda gämisiniň galyndylaryndan tapdylar. Ilkibaşda onuň gymmat bahaly zatlar saklanan kiçi sandygy ýapýan gulp bolandygy çaklanyldy. Sebäbi tapyndynyň golaýyndan kümüş ispan teňňeleri we çeküw üçin ulanylýan ownuk daşlar hem tapylypdy.

Taryhy tapyndy Suonsiniň Milli muzeýinde «Tides of Treasure» atly sergide görkezilýär. Sergi 2027-nji ýylyň sentýabr aýyna çenli dowam eder.