“Arçalyk” Bakudaky “InterFood Azerbaijan” halkara sergisinde türkmen önümlerini hödürlär
Türkmenistanyň içgi senagatynyň öňdebaryjy wekili bolan “Arçalyk” hususy kärhanasy 5–8-nji maý aralygynda Azerbaýjan Respublikasynyň paýtagty Baku şäherinde geçiriljek “InterFood Azerbaijan” atly 31-nji halkara azyk senagaty sergisine gatnaşar. Bu barada çäräniň resmi guramaçylary habar berýärler.
Hazarýaka sebitiniň iň iri azyk forumlarynyň biri hasaplanýan bu sergi, her ýyl dünýäniň 20-den gowrak ýurdundan müňlerçe hünärmeni we işewür hyzmatdaşlary bir ýere jemleýär.
“InterFood Azerbaijan” sergisiniň ekspozisiýasy diňe bir taýýar önümleri däl, eýsem döwrebap tehnologiýalary hem öz içine alýar. Çäräniň çäklerinde aşakdaky ugurlar boýunça önümler görkeziler:
- “Arçalyk” kompaniýasynyň agyz suwlary we gazly alkogolsyz içgileri;
- Konditer, et, gök-bakja we miwe önümleri, çaýlaryň dürli görnüşleri;
- Önümleri gaýtadan işlemek, gaplamak we belliklemek (markirlowka) üçin niýetlenen enjamlar;
- Ýöriteleşdirilen halal önümleriň bölümi.
Serginiň maksatnamasynda B2B (biznesden-biznese) görnüşindäki ikitaraplaýyn duşuşyklara aýratyn orun berilýär. Bu duşuşyklar “Arçalyk” kompaniýasyna daşary ýurtly hyzmatdaşlar bilen göni gepleşikleri geçirmäge, eksport mümkinçiliklerini giňeltmäge we sebit bazarynda öz ornunu berkitmäge ýardam eder.
Bu iri göwrümli çäre Azerbaýjanyň döwlet düzümleriniň, pudaklaýyn assosiasiýalaryň we BMG-niň Azyk we oba hojalyk guramasynyň (FAO) resmi goldawy bilen geçirilýär.
