«Arkadag» topary AFK-2 Çempionlar ligasynyň saýlama tapgyrynda «Goa» bilen duşuşar
Aziýa Futbol Konfederasiýasy (AFK) Türkmenistanyň «Arkadag» futbol toparynyň AFK-2 Çempionlar ligasynyň saýlama tapgyryndaky garşydaşyny kesgitledi. Milli çempionymyzyň bu tapgyrdaky garşydaşy Hindistanyň «Goa» futbol kluby bolar.
Duşuşyk şu ýylyň 12-nji awgustynda Türkmenistanda, «Arkadag» stadionynda geçiriler. Bu oýnuň netijesi boýunça ýeňiş gazanan topar ýaryşyň toparçalaýyn tapgyryna göni ýollanma alar. Duşuşykda utulan toparyň bolsa öz çykyşyny AFK-niň Çagyryş ligasynda dowam etdirmegine garaşylýar.
«Arkadag» topary soňky möwsümlerde görkezen netijeli oýunlary bilen ýurdumyzyň iň güýçli klublarynyň biri hökmünde bu ýaryşa gatnaşmaga hukuk gazandy. Onuň garşydaşy bolan «Goa» kluby bolsa Hindistanyň Superkubogynda gazanan üstünliginden soň saýlama tapgyra çykmagy başardy.
Türkmen klublarynyň ozalky ýyllarda hindi toparlaryna garşy geçiren oýunlarynyň statistikasy türkmen futbolçylarynyň oňyn netijelerini görkezýär. Şeýle oýun tejribesi «Altyn Asyr» we «Ahal» klublarynyň halkara meýdançalarynda hindi futbol ligasynyň wekillerini ýeňmegi başarmagy bilen hem berkidilýär.
AFK-2 Çempionlar ligasy Aziýa sebitindäki klub ýaryşlarynyň içinde ähmiýeti boýunça ikinji orny eýeleýär. 2026/27 möwsüminiň toparçalaýyn tapgyry sentýabr aýynda başlanar.
Bellemeli ýeri, Türkmenistan AFK-niň Çagyryş ligasynda hem wekilçilik edýär. Milli çempionatyň jemleri boýunça göni ýollanma alan «Ahal» futbol kluby bu ýaryşda ýurdumyzyň adyndan çykyş eder.
