Türkmenistanyň Söwda-senagat edarasynda şu ýylyň 27–29-njy iýuly aralygynda Türkmenistan – Özbegistan işewürler maslahatyny guramak meýilleşdirilýär. Bu barada degişli edaranyň resmi internet saýtynda habar berildi. Iki dostlukly goňşu ýurduň arasyndaky söwda-ykdysady gatnaşyklary has-da pugtalandyrmaga, maýa goýum taslamalaryny giňden ara alyp maslahatlaşmaga we telekeçileriň arasynda göni hyzmatdaşlygy ýola goýmaga gönükdirilen bu çäre uly ähmiýete eýedir. Maslahatyň maksatnamasyna laýyklykda, degişli ministrlikleriň, pudaklaýyn dolandyryş edaralaryň we iki ýurduň işewür toparlarynyň wekilleriniň gatnaşmagynda ikitaraplaýyn duşuşyklar hem-de B2B görnüşindäki gepleşikler guralar. Duşuşyklarda gurluşyk senagatynda hyzmatdaşlygy giňeltmek, täze önümçilik mümkinçiliklerini özara tanyşdyrmak we geljegi uly bilelikdäki taslamalary durmuşa geçirmek meselelerine aýratyn üns berler. Häzirki wagtda Türkmenistanyň Söwda-senagat edarasy tarapyndan daşary ýurtly wekilleriň we ýurdumyzyň telekeçileriniň netijeli iş alyp barmagy üçin ähli amatly şertleri döretmek, şeýle hem çäräni ýokary guramaçylyk derejesinde geçirmek boýunça giň göwrümli taýýarlyk işleri alnyp barylýar. Ýurtlarymyzyň arasyndaky taryhy dostlukly we özara bähbitli gatnaşyklaryň nobatdaky beýany boljak bu işewürler maslahaty ykdysady baglanyşyklaryň has-da işjeňleşmegine we täze belentliklere çykmagyna kuwwatly itergi berer.