Aşgabatda emeli aň ulgamy boýunça Milli strategiýanyň taslamasy maslahatlaşyldy
Emeli aň tehnologiýalary Türkmenistanyň sanly giňişligini we ykdysady düzümini döwrebaplaşdyrmagyň aýrylmaz bölegine öwrülýär. Paýtagtymyz Aşgabat şäherinde ýurdumyzyň degişli edaralarynyň wekilleriniň, milli we halkara hünärmenleriň gatnaşmagynda möhüm bilermenler maslahaty geçirildi. Duşuşykda Türkmenistanyň emeli aň ulgamyndaky geljekki Milli strategiýasynyň taslamasyna seredildi, diýip «Orient» portaly habar berýär.
Bu ähmiýetli çäre ýurdumyzyň Aragatnaşyk ministrligi tarapyndan Birleşen Milletler Guramasynyň Ösüş Maksatnamasy (BMGÖM) bilen bilelikde, sebit derejesindäki sanly başlangyçlaryň çäklerinde guraldy.
Maslahatyň dowamynda esasy üns durnukly, ygtybarly we howpsuz milli emeli aň ekoulgamyny kemala getirmek meselesine gönükdirildi. Gatnaşyjylar ýurdumyzyň häzirki IT-infrastrukturasynyň taýýarlyk derejesini, milli maglumatlar ekoulgamynyň ýagdaýyny, şeýle-de döwlet dolandyryş ulgamynda döwrebap neýroulgamlary hem-de sanly algoritmleri ornaşdyrmagyň mümkinçiliklerini jikme-jik seljerdiler.
Duşuşykda halkara tejribesiniň integrasiýasyna aýratyn ähmiýet berildi. Bilermenleriň bellemegine görä, Türkmenistanyň sanly ösüş ugry emeli aňyň etiki, hukuk we jogapkärli ulanylyşy boýunça kabul edilen berk ählumumy standartlara doly laýyk gelmelidir.
Gepleşikleriň jemleri boýunça taraplar geljekki sanly syýasatyň esasy ugurlaryny ylalaşdylar. Emeli aň ulgamy boýunça gutarnykly taýarlanyljak Milli strategiýa diňe bir tehnologik ulgamy kämilleşdirmek bilen çäklenmän, eýsem takyk hem-de dolandyrylýan maglumatlar esasynda ýurduň inklýuziw ykdysady ösüşini üpjün etmäge we institusional mümkinçiliklerini has-da pugtalandyrmaga ýardam eder.
