Balkan welaýatynyň Türkmenbaşy etrabynda ýangyn howpsuzlygy bölüminiň täze binasynyň gurluşygyna taýýarlyk görülýär. Bu maksat bilen Türkmenistanyň Gurluşyk we binagärlik ministrligi degişli gurluşyk işlerini ýerine ýetirmek boýunça bäsleşik yglan etdi.

Bäsleşik Türkmenistanyň Içeri işler ministrliginiň sargydy esasynda geçirilýär. Täze binanyň gurulmagy etrapda ýangyn howpsuzlygy boýunça gulluklaryň iş şertlerini döwrebaplaşdyrmaga we olaryň maddy-enjamlaýyn binýadyny berkitmäge gönükdirilendir.

Bäsleşige gatnaşmaga isleg bildirýän taraplaryň haýyşnamalary we teklipleri Türkmenistanyň Gurluşyk we binagärlik ministrliginiň Bazary öwreniş we daşary ykdysady gatnaşyklar müdirliginde bellenilen tertipde kabul edilýär.

Resminamalary tabşyrmak üçin soňky möhlet 2026-njy ýylyň 7-nji oktýabry hökmünde kesgitlenildi.

Gyzyklanýan taraplar zerur maglumatlary Aşgabat şäheriniň Arçabil şaýolunyň 84-nji jaýynda ýerleşýän degişli müdirlikden alyp bilerler.

Bu taslamanyň durmuşa geçirilmegi Türkmenbaşy etrabynda ýangyn howpsuzlygy gullugynyň işini kämilleşdirmäge, işgärler üçin döwrebap iş şertlerini döretmäge we ilatyň hem-de desgalaryň howpsuzlygyny üpjün etmek boýunça mümkinçilikleri giňeltmäge ýardam eder.