Bütindünýä welosiped güni: Ankarada türkmenistanlylaryň gatnaşmagynda sport çäresi guraldy
2026-njy ýylyň 3-nji iýunynda Türkmenistanyň Türkiýe Respublikasyndaky Ilçihanasy tarapyndan Bütindünýä welosiped güni hem-de Türkmenistanyň Garaşsyzlygynyň şanly 35 ýyllygy mynasybetli paýtagt Ankara şäherinde köpçülikleýin sport çäresi guraldy. Ankaranyň gözel künjekleriniň biri bolan Eýmir kölüniň kenaryndaky ýörite welosiped ýolunda geçirilen bu çärä diplomatik wekilhanalaryň işgärleri, Türkiýedäki türkmen diasporasynyň wekilleri, ýerli habar beriş serişdeleri hem-de ýokary okuw mekdeplerinde bilim alýan talyp ýaşlar işjeň gatnaşdylar.
Sport ýörişiniň başlanmagynyň öňüsyrasynda guralan dabaraly açylyş çäresinde çykyş edenler Bütindünýä welosiped gününiň hut Türkmenistanyň başlangyjy esasynda BMG tarapyndan döredilmeginiň dünýä jemgyýetçiliginde aýratyn ykrar edilýändigini bellediler. Bu halkara baýramyň döredilmegi ýurdumyzyň bedenterbiýäni we sporty ösdürmek, jemgyýetde sagdyn durmuş ýörelgesini durnukly wagyz etmek, ekologiýa taýdan arassa ulag serişdelerini durmuşa ornaşdyrmak hem-de ýaş nesli daşky gurşawa aýawly çemeleşmek ruhunda terbiýelemek ugrunda alyp barýan giň gerimli işleriniň aýdyň netijesidir.
Kölüň kenaryndaky sport ýörişi tamamlanandan soň, oňa gatnaşan myhmanlar we ýaşlar sporty ösdürmäge, dünýäde parahatçylygy, dostlugy hem-de durnukly hyzmatdaşlygy pugtalandurmaga gönükdirilen Türkmenistanyň döwlet derejesindäki halkara başlangyçlaryny hemişe doly goldaýandyklaryny uly buýsanç bilen beýan etdiler.
