C5+1: Germaniýa we Merkezi Aziýa ýurtlarynyň ylmy-ykdysady dialogy
Gadymy Hywa şäheri sebitara hyzmatdaşlygyň täze merkezi bolar. 2026-njy ýylyň 16–17-nji apreli aralygynda bu ýerde «Merkezi Aziýa + Germaniýa» (C5+1) formatyndaky ilkinji bilermenler forumy geçiriler. Bu barada Özbegistanyň Strategik we sebitara barlaglar instituty habar berdi.
Bu möhüm çäre Özbegistanyň Prezidentiniň ýanyndaky Strategik we sebitara barlaglar instituty, Konrad Adenauer adyndaky gaznanyň sebit wekilhanasy hem-de Fridrih Ebert adyndaky gaznanyň Özbegistandaky wekilhanasy tarapyndan guralýar.
Forumyň esasy maksady «Merkezi Aziýa + Germaniýa» hyzmatdaşlygynyň analitiki binýadyny döretmekden we bilermenleriň hemişelik işleýän platformasyny ýola goýmakdan ybaratdyr.
Foruma 50-den gowrak wekil, şol sanda:
- Sebitiň we Germaniýanyň iri analitik merkezleriniň ýolbaşçylary;
- Ylym-bilim we işewürlik dünýäsiniň bilermenleri;
- Strategik barlaglar boýunça hünärmenler gatnaşarlar.
Iki günüň dowamynda bilermenler syýasy dialogy berkitmek, senagat we ykdysady hyzmatdaşlygy täze derejä çykarmak, sanly özgertmeleri çaltlandyrmak hem-de zähmet migrasiýasyny tertipleşdirmek ýaly möhüm ugurlary ara alyp maslahatlaşarlar. Şeýle hem akademiki alyş-çalyşlar arkaly adam kapitalyny ösdürmek meselesine aýratyn üns berler.
«Merkezi Aziýa + Germaniýa» formaty Germaniýa Federatiw Respublikasy bilen sebitiň bäş döwletiniň — Türkmenistanyň, Gazagystanyň, Gyrgyzystanyň, Täjigistanyň we Özbegistanyň arasyndaky strategik hyzmatdaşlygy aňladýar. Hywa forumy bu hyzmatdaşlygyň täze ylmy we amaly ugurlaryny kesgitlemekde möhüm ädim bolar.
