Koreýanyň «Daewoo Engineering & Construction» (Daewoo E&C) kompaniýasy Türkmenistanda Garagum kanalyny döwrebaplaşdyrmak taslamasyny ýerine ýetirer. Degişli ähtnama 15-nji sentýabrda Seulda geçirilen türkmen-koreý işewürlik forumynyň çäklerinde Türkmenistanyň Suw hojalygy döwlet komiteti bilen gol çekildi.

Resminama taraplaryň arasyndaky hyzmatdaşlygy berkitmäge we Garagum kanalynyň aşaky böleginiň takmynan 250 kilometrlik bölegini döwrebaplaşdyrmak taslamasyny durmuşa geçirmek üçin binýat döretmäge gönükdirilendir. Kompaniýanyň metbugat beýanatynda bellenilişi ýaly, “Daewoo E&C” bu taslama gatnaşmagy göz öňünde tutýar.

«Daewoo E&C» kompaniýasynda ähtnamanyň kompaniýanyň Türkmenistanyň suw hojalygy we ekologiýa infrastrukturasy bazaryna aralaşmagy üçin binýat döredýändigi bellenildi. «Biz bu taslamany üstünlikli durmuşa geçirmek üçin “Daewoo E&C” kompaniýasynyň raýat gurluşygy çygryndaky tehnologik mümkinçiliklerini hem-de tejribesini ulanarys we Türkmenistan bilen dürli ugurlarda hyzmatdaşlygy giňeltmegi dowam etdireris» diýip, kompaniýanyň wekili beýan etdi.

Taraplar şeýle hem Türkmenistanyň suw serişdeleri we ekologiýa infrastrukturasy ulgamynda geljegi uly taslamalarynda hyzmatdaşlyk etmegiň mümkinçiliklerini öwrenmegi maksat edinýär.

Türkmen-koreý işewürlik forumynyň çäklerinde «Daewoo E&C» kompaniýasynyň başlygy Çon Won Ju Türkmenistanyň Prezidenti Serdar Berdimuhamedow bilen duşuşdy. Duşuşygyň dowamynda kompaniýanyň ýurtda öz işini has-da giňeltmek baradaky meýilnamalary hödürlendi.

Garagum kanaly ýurdumyzyň oba hojalygy, ilatyň durmuşy we senagat zerurlyklary üçin suw bilen üpjün etmekde möhüm orun eýeleýär. Soňky ýyllarda suw serişdelerini dolandyrmagyň netijeligini ýokarlandyrmak we durnukly suw üpjünçiligini üpjün etmek üçin ony döwrebaplaşdyrmaga bolan zerurlyk artýar.

Geçen ýylyň maý aýynda «Daewoo E&C» Türkmenistanda mineral dökünleri öndürýän zawodyň gurluşygy boýunça şertnama baglaşyp, şunlukda ilkinji gezek ýurduň bazaryna çykdy. Kärhana ýylda 350 müň tonna fosfor dökünlerini we 100 müň tonna ammoniý sulfatyny öndürer we 2028-nji ýylda ulanyşa berler diýlip garaşylýar.

Kompaniýa bu taslama Türkmenistanda senagat we infrastruktura desgalarynyň gurluşygyna geljekde gatnaşmak üçin binýat hökmünde garaýar.