Ženewada Merkezi Aziýa ýurtlarynyň Kärdeşler arkalaşyklarynyň hyzmatdaşlygy ara alnyp maslahatlaşyldy
Ženewada dowam edýän Halkara zähmet maslahatynyň 114-nji sessiýasynyň çäginde Merkezi Aziýa ýurtlarynyň milli Kärdeşler arkalaşyklarynyň ýolbaşçylarynyň gatnaşmagynda möhüm duşuşyk geçirildi. Oňa Halkara zähmet guramasynyň Zähmetkeşleriň işi boýunça býurosynyň (ACTRAV), şeýle-de Azerbaýjan we Mongoliýa döwletleriniň kärdeşler arkalaşyklarynyň wekilleri hem gatnaşdy.
Duşuşygyň esasy temasy sebitde kärdeşler arkalaşyklarynyň işini ösdürmek, jemgyýetçilik dialogyny berkitmek we guramalaryň arasyndaky özara hyzmatdaşlygy giňeltmek boldy.
Aşgabatda geçiriljek möhüm çäre
Duşuşykda noýabr aýynda Aşgabat şäherinde Merkezi Aziýa ýurtlarynyň we Azerbaýjanyň kärdeşler arkalaşyklarynyň ýolbaşçylarynyň duşuşygyny hem-de ylmy-amaly maslahatyny geçirmek boýunça meýilnamalar ara alnyp maslahatlaşyldy. Bu çäreler Türkmenistanyň Kärdeşler arkalaşyklarynyň Milli merkezi bilen Zähmetkeşleriň işi boýunça býurosynyň arasynda maý aýynda gol çekilen Sebitleýin bilelikdäki çäreleriň meýilnamasyna laýyklykda amala aşyrylýar.
Türkmenistan – Gazagystan hyzmatdaşlygy
Maslahatyň çäginde Türkmenistanyň Kärdeşler Arkalaşyklarynyň Milli merkeziniň başlygy Oguljennet Berdiliýewa bilen Gazagystanyň Kärdeşler Arkalaşyklary Federasiýasynyň başlygy Satybaldy Dauletalynyň arasynda ikitaraplaýyn duşuşyk hem boldy.
Taraplar zähmetkeşleriň hukuklaryny we bähbitlerini goramak boýunça hyzmatdaşlygy ösdürmegiň ýollaryny ara alyp maslahatlaşdylar. Gazagystan tarapy O.Berdiliýewa öz ýurduna resmi sapar bilen gelmegi we iki ýurduň kärdeşler arkalaşyklarynyň arasynda Özara düşünişmek hakyndaky Ähtnama gol çekmegi teklip etdi. Şeýle-de, türkmen wekiliýeti Almata şäherinde geçiriljek sebitleýin maslahata çagyryldy.
Duşuşygyň jemleri boýunça taraplar sebitde dostlukly gatnaşyklary berkitmäge we zähmetkeşleriň durmuş-ykdysady bähbitlerini goramakda hyzmatdaşlygy dowam etmäge taýýardyklaryny tassykladylar.
