Fabio Kannawaro Özbegistanyň futbol boýunça milli ýygyndy toparyna tälimçilik eder

Özbegistanyň Futbol assosiasiýasy dünýä çempionatyna üç gezek gatnaşan we 2006-njy ýylda dünýä çempiony bolan Fabio Kannawaro bilen şertnama baglaşdy.

Şunlukda, 52 ýaşly italiýaly tälimçi Özbegistanyň milli ýygyndysyny 2026-njy ýylda ABŞ-da, Kanadada we Meksikada geçiriljek futbol boýunça dünýä çempionatyna taýýarlar.

Şertnamanyň möhleti «1+4» görnüşinde kesgitlenendir — ýagny, uzak möhletli hyzmatdaşlyk baradaky karar milli ýygyndynyň geljekki dünýä çempionatyndaky çykyşlarynyň netijelerine görä kabul ediler.

Fabio Kannawaro ozal Hytaýyň «Guançžou Ewergrand», Saud Arabystanynyň «Al-Nasr», Italiýanyň «Benewento» we «Udineze», şeýle hem Horwatiýanyň «Dinamo Zagreb» toparlaryna tälimçilik edipdi. Ol Zagrebiň «Dinamo» klubundan şu ýylyň aprel aýynda — üç aýlyk iş tejribesinden soň çykypdy. Kannawaro heniz tälimçi hökmünde uly üstünlik gazananok. Muňa garamazdan, 2019-njy ýylda «Guançžou Ewergrand» bilen Hytaýyň çempionatynda gazanan ýeňşi onuň esasy üstünligi hökmünde görkezilýär.

2006-njy ýylda Italiýanyň ýygyndysy bilen dünýä çempiony bolanda ol toparyň kapitany hökmünde çykyş edipdi. Şol ýylyň dowamynda hem dünýäniň iň gowy futbolçysy hökmünde «Altyn top» («Ballon d’Or») baýragyna mynasyp bolupdy.