Dünýäde 100-den gowrak awtoulag kompaniýasy bolup, şolaryň 14-15-si meşhur awtoulaglary bilen tapawutlanýar. Dünýä awtoulag bazarynda «Toyota», «Volkswagen», «Hyundai» we «General Motors» ýaly kompaniýalar öňdeligi eýeleýär. «Toyota» dünýäde iň köp modeli (ulag kysymy) bolan awtoulag kompaniýasy hasaplanýar. Ýapon awtokonserniniň «Land Cruiser» (1951), «Crown» (1955), «Corolla» (1966), «Century» (1967), «Mark» (1968), «Hilux» (1968), «Carina» (1970), «Camry» (1982), «Land Cruiser Prado» (1984), «Avalon» (1994), «RAV4» (1994), «Sienna» (1997), «Venza» (1997), «Prius» (1997), «Vitz» (1998), «Highlander» (2000), «Yaris» (2002), «Aurion» (2006), «Aqua» (2011), «Mirai» (2014), «Starlet» (2019), «Frontlander» (2021), «Allion» (2021) ýaly 50-den gowrak dürli modeli bar. «Lexus», «Daihatsu» we «Hino» ýaly brendleriň birleşigi bolan «Toyota» 1937-nji ýylda Aýti şäherinde Toýoda Kiitiro tarapyndan esaslandyrylýar. 1936-njy ýylda «Toyota»-nyň ilkinji görnüşi bolan «Model AA» işlenip düzülenden soň adyny döretmek barada bäsleşik geçirilýär. Gelip gowşan 27 müň teklibiň (sözüň) arasyndan Toýoda sözüniň üýtgedilen görnüşi bolan Toýota saýlanýar. Ýaponlarda gulaga ýakymly eşidilýän Toýota sözüni 8 gezek gaýtalanyňdan soň, baý bolýarsyň diýen ynanç hem bar. Ilkibaşda ýapon katakanasy (iýeroglif) bilen ýazylan kompaniýanyň ady 1950-nji ýylda halkara derejesinde tanalyp başlandan soň baş harplar bilen iňlisçe «TOYOTA» diýlip ýazylýar. Dünýäniň iň uly awtoulag öndürijisi bolan bu kompaniýanyň logosy 1990-njy ýylda işlenip düzülýär. Has uly ellipisde (ýumurtga şekilli tegelek) iki sany kesişýän ellipis ýerleşdirilen bu logonyň manysy öndüriji bilen müşderileriň arasyndaky berk baglanyşygy we ynamy görkezýär.
«Toyota» sedan, heçbek, SUV we ýolsuz ýerden ýöreýän dürli görnüşli ulaglary öndürýär. Awtoulag söýüjileriň iň halaýan brendi «Toyota»-nyň lýuks modeli bolan «Lexus» hasaplanýar. 1989-njy ýylda döredilen ýapon brendi ygtybarlylygy, rahatlygy, berkligi we ösen tehnologiýasy bilen beýleki ulaglardan tapawutlanýar. Dünýäde 90-dan gowrak ýurtda satylýan kaşaň awtoulagyň ilkinji modeli «LS 400» bolup, bu sedan köplerde uly gyzyklanma döredýär. «Lexus»-yň önümçiligi sedandan başlanan hem bolsa, häzirki wagtda kupe, krossower we ýolsuz ýerden ýöreýän görnüşleri hem bar.
Köpleriň söýgüsini gazanan ýapon brendiniň iň köp satyn alnan modeli «Corolla» hasaplanýar. «Kiçi täç» diýen manyny aňladýan «Corolla» modeli 1966-njy ýylda köpçülige hödürlenip başlanýar. Maglumatlara görä, şu güne çenli «Toyota»-nyň bu modelinden 50 milliondan gowragy satyn alnypdyr. Bu üstünlik kompaniýanyň «Corolla» modeline siňdiren irginsiz zähmetiniň netijesidir. Tygşytlylygy, amatlylygy we kaşaňlygy bilen köpleriň söýgüsini gazanan «Corolla» maşyn bazarynda iň meşhur awtoulaglaryň biridir. «Toyota»-nyň 1997-nji ýylda köpçülige hödürlenen «Prius» modeli elektrik energiýasy bilen işleýän ulaglaryň taryhynda uly ösüş hasaplanýar. Şondan soňra elektroulaglaryň sany barha köpelip, awtoulag kompaniýalarynyň ählisi diýen ýaly elektrik energiýasy bilen hereket edýän we gibrid ulaglary öndürmäge ýöriteleşip başlaýarlar. Ýapon brendiniň iň seýrek modelleri «Toyota Century Convertible» bolup, ýapon imperatorlygy üçin 4 sanysy öndürilipdir. «Toyota»-nyň köpçülikleýin öndürilen iň seýrek görnüşi «Toyota 2000GT»-den bolsa bary-ýogy 337 sanysy bar. ABŞ-da satylan kaşaň sport ulagy bahasynyň gymmatdygy bilen tapawutlanýar. Ýapon awtokonserniniň iň kiçi ulagy «Toyota Aygo X» (uzynlygy 3,7, ini 1,7, beýikligi 1,5 metr) bolup, iň ulusy «Toyota Sequoia» (uzynlygy 5,2, ini 2, beýikligi 1,9 metr) hasaplanýar. Dünýäde dürli görnüşli awtoulaglary öndürmekde «Volkswagen Group» ikinji orny eýeleýär.
Teswirler
Entek teswir ýok. Ilkinji boluň.