“Liwerpul” Endi Robertsonyň “Tottenhema” geçmegine rugsat bermedi

“Liwerpul” futbol kluby häzirki gyşky transfer penjiresinde goragçy Endi Robertsonyň “Tottenhem Hotspur” klubuna geçmegine rugsat bermekçi däl.

The Athletic neşiriniň habar bermegine görä, taraplaryň arasynda Şotlandiýanyň milli ýygyndysynyň futbolçysy boýunça gepleşikler geçirildi. Robertsonyň “Liwerpul” bilen şertnamasy tomusda tamamlanýar we “Tottenhem” transferiň Çempionlar ligasynyň “Garabag” bilen duşuşygyndan soň amala aşjakdygyna ynanýardy. Emma bu diňe Liwerpulyň onuň ornuna täze futbolçy tapyp bilmegi şertinde mümkin bolýardy.

Klub ýolbaşçylygy ýagdaýy seljerip, toparyň häzirki ýagdaýyny nazara alyp, 31 ýaşly wise-kapitany goýbermezlik kararyna geldi. Endi Robertson möwsümiň ahyryna çenli baş tälimçi Arne Slotyň meýilnamalarynyň möhüm bölegi bolup galýar.

“Liwerpul” ätiýaçlyk hökmünde Kostas Tsimikasy “Roma” klubundan yzyna çagyrmagy hem göz öňünde tutdy. Emma bu ýagdaý italýan klubunyň razylygyny we olaryň öz ornuna täze futbolçy tapmagyny talap edýär. “Roma” sport direktory Frederik Massara taraplaryň arasynda gepleşikleriň bolandygyny tassyklady.

“Tottenhem” Robertsony tomusda erkin agent hökmünde almak isleýärdi, emma Ben Deýwisiň aýagynyň şikeslenmegi sebäpli bu gyzyklanma öňe süýşürildi. Robertson bolsa klubdan gitmek ugrunda basyş etmedi we “Bornmut” bilen duşuşykda meýdança çykyp, professional garaýşyny görkezdi.

“Liwerpul” häzirki wagtda gorag hatarynda birnäçe kynçylyk bilen ýüzbe-ýüz. Klub indi Robertsonyň möwsümiň ahyryna çenli “Enfildde” galmagyna garaşýar.