Sähra jümmüşinde kibersport: Geýmerler Garagumda «Counter-Strike 2» oýnadylar
Türkmenistanda sosial ulgamlarda çalt meşhurlyk gazanan täsin we ähmiýetli kibersport wakasy boldy. Paýtagtymyzyň «LevelUp» kiber-kluby hem-de Türkmenistanyň Milli elektron sport federasiýasynyň (TMESF) guramaçylygynda geýmerler Garagum sährasynyň ortasynda — üýtgeşik ekstremal şertlerde «Counter-Strike 2» boýunça ýoldaşlyk ýaryşyny geçirdiler. Çäreden taýýarlanan wideohasabat özüniň täsirli gurşawy bilen internet ulanyjylarynyň ünsüni bada-bat özüne çekdi.
Oýun meýdançasy göni çäge depeleriniň üstünde guraldy. Tehnikany çägeden goramak we oýunçylar üçin amatly şertleri döretmek maksady bilen, guramaçylar depeleriň üstüne türkmen halylaryny ýazyp, döwrebap oýun stansiýalaryny ýerleşdirdiler. Bu taslamadaky iň uly tehniki kynçylyklaryň biri tebigatyň goýnunda awtonom elektrik üpjünçiligini guramak boldy. Emma güýçli generator bu wezipäň hötdesinden üstünlikli gelip, kompýuterleriň hem-de tor enjamlarynyň durnukly işlemegini üpjün etdi.
Ýoldaşlyk häsiýetinde geçen oýunlar wirtual bäsleşikleriň janköýerlerini bir ýere jemledi. Gatnaşyjylar bu çäräniň özlerine unudylmasyz we täze duýgulary döredendigini belläp, sanly kartadaky gyzgyn göreşi sähra tebigaty, arassa howa we Garagumuň täsin günbataryny synlamak bilen ajaýyp utgaşdyrdylar.
Bellemeli zat, «LevelUp» kluby üçin ekstremal oýun seanslaryny geçirmek eýýäm özboluşly ýörelgä öwrülip barýar. Mundan ozal topar Derwezedäki meşhur «Garagum ýalkymy» gaz krateriniň öňünde hem geýmer agşamyny gurapdy. Şeýle döredijilikli başlangyçlar diňe bir ýurdumyzda kibersporty ösdürmäge däl, eýsem, Türkmenistanyň özboluşly syýahatçylyk mümkinçiliklerini täzeçil nukdaýnazardan dünýä ýaýmaga ýardam berýär.
