Türkmen topragy özboluşly tebigy gözelligi, ösümlik we haýwanat dünýäsiniň köpdürlüligi, baý tebigy serişdeleri bilen tapawutlanýar. Ata-babalarymyz tebigata aýratyn sarpa goýup, onuň baýlyklaryndan rejeli peýdalanmagy we daşky gurşawy aýawly saklamagy durmuş ýörelgesine öwrüpdirler. Şol milli däpleri dowam etdirmek hem-de tebigy mirasy geljekki nesillere ýetirmek häzirki döwrüň möhüm wezipeleriniň biridir.
Ýurdumyzda alnyp barylýan döwlet ekologiýa syýasaty daşky gurşawy goramaga, tebigy baýlyklary rejeli peýdalanmaga, ösümlik we haýwanat dünýäsini gorap saklamaga hem-de baýlaşdyrmaga gönükdirilendir. Bu ugurdaky işler ilatyň ýaşaýşy üçin amatly ekologiýa şertlerini döretmek we tebigy gözelligi geljekki nesillere ýetirmek maksadyny göz öňünde tutýar.
Häzirki wagtda Türkmenistan biologik köpdürlüligi gorap saklamak, taryhy we tebigy ýadygärlikleri aýawly saklamak, senagat kärhanalarynyň daşky gurşawa ýetirýän täsirini azaltmak ýaly ugurlarda degişli çäreleri durmuşa geçirýär. Şeýle-de gaýtadan dikeldilýän energiýa çeşmelerinden peýdalanmaga we önümçilige «ýaşyl» tehnologiýalary ornaşdyrmaga aýratyn ähmiýet berilýär.
Tebigaty goramak diňe bir döwlet edaralarynyň däl, eýsem, jemgyýetiň her bir agzasynyň hem jogapkärçiligidir. Daşky gurşawa aýawly çemeleşmek we tebigy serişdelerden tygşytly peýdalanmak ekologiýa abadançylygynyň möhüm şertleridir.









Teswirler
Entek teswir ýok. Ilkinji boluň.