Türkmenistanda «Toyota» kompaniýasynyň resmi dileri bolan «Toyota Garagum Ulag» kärhanasynyň işgärleri «National Skill Contest 2026» atly hünär bäsleşiginde üstünlik gazandylar. Bäsleşige gatnaşan kompaniýanyň dört wekiliniň üçüsi baýrakly orunlary eýeledi.

«Toyota Central Asia» tarapyndan guralan bäsleşik 5–6-njy noýabrda Daşkent şäherinde geçirildi. Oňa gatnaşan hünärmenler özleriniň nazary bilimlerini we amaly başarnyklaryny görkezdiler. Gatnaşyjylaryň çykyşlaryna garaşsyz eminler topary baha berdi. Ýeňijileri sylaglamak dabarasy 6-njy noýabrda geçirildi.

Bäsleşigiň netijelerine görä, «Toyota Garagum Ulag» kompaniýasynyň wekilleri aşakdaky orunlara mynasyp boldular:

  • 1-nji orun — serwis boýunça maslahatçy Serdar Selimow;

  • 2-nji orun — ätiýaçlyk şaýlary bölüminiň ýolbaşçysy Gurbansapar Klyçew;

  • 3-nji orun — müşderiler bilen işlemek boýunça hünärmen (CR Specialist) Aýjeren Annageldiýewa.

Bir bäsleşikde üç baýrakly ornuň gazanylmagy kompaniýanyň taryhynda rekord netije boldy.

«Garagum Ulag» kompaniýasy 2009-njy ýyldan bäri Türkmenistanda «Toyota» awtoulaglarynyň resmi dileri hökmünde işleýär. 17 ýyldan gowrak wagt bäri kärhana hyzmat ediş infrastrukturasyny ösdürmek, müşderilere hyzmat etmegiň hilini ýokarlandyrmak we işgärleriniň hünär derejesini kämilleşdirmek boýunça işleri alyp barýar.

Kompaniýanyň wekilleriniň bellemegine görä, hyzmatlaryň hili we müşderileriň ynamy işgärleriň hünär başarnyklaryna gönüden-göni baglydyr. Şonuň üçin işgärleri yzygiderli okatmak, olaryň hünär derejesini ýokarlandyrmak we «Toyota» kompaniýasynyň halkara standartlaryna eýermek işiň möhüm ugurlarynyň biri bolup durýar.

«Garagum Ulag» kompaniýasynda gazanylan netijäniň toparlaýyn işiň, toplanan tejribäniň we kämillige ymtylyşyň netijesidigi bellenildi. Kärhananyň ýolbaşçylary baýrakly orunlara mynasyp bolan işgärleri gazanan üstünlikleri bilen gutladylar.