Türkiýe gozgalmaýan emläk söwdasynda nagt puldan doly ýüz öwürýär
Türkiýäniň hökümeti gozgalmaýan emläk bazarynda howpsuzlygy we aýdyňlygy üpjün etmek maksady bilen düýpli özgerişligi amala aşyrýar. 2026-njy ýylyň 1-nji iýulyndan başlap, ýurtda emläk söwdalaşygynda nagt pul arkaly hasaplaşmak düýbünden gadagan ediler we ähli amallar mejbury tertipde «eskrou» (goralýan ýörite bank hasaplary) ulgamyna geçiriler.
Täze düzgüne görä, alyjy şertnama baglaşylanda puluny ygtyýarly bankdaky ýörite petiklenen hasaba geçirer. Bu serişdeler eýeçilik hukugy doly resmileşdirilýänçä dondurular we diňe şertnama üstünlikli tamamlanandan soň satuwça geçiriler. Eger-de ylalaşyk sowa geçse, pul doly möçberde alyja yzyna gaýtarylar.
Ekspertleriň pikiriçe, bu reformanyň birnäçe esasy maksady bar:
- Galpçylygyň öňüni almak: Aýratyn-da daşary ýurtly maýadarlary aldawa salýan mehanizmleri doly aradan aýyrmak.
- Kölege ykdysadyýetine garşy göreş: Emlägiň hakyky bahasyny gizlemek we resmi resminamalarda bahany pes görkezmek tejribesine soň goýmak.
- Halkara ynamy ýokarlandyrmak: Hasaplaşyklaryň aýdyňlygyny üpjün etmek arkaly Türkiýäniň emläk bazaryna daşary ýurt maýasynyň akymyny durnuklaşdyrmak.
Häzirki wagtda, ýagny 2026-njy ýylyň 1-nji iýulyna çenli, bu ulgam synag hökmünde we meýletin esasda işleýär. Şondan soň bolsa düzgün wezipesinden we raýatlygyndan garaşsyzlykda hemme şahslar üçin mejbury bolar.
