Türkmenistanyň ýaş küştçüsi Allaýar Şirliýew Birleşen Arap Emirlikleriniň Abu-Dabi şäherinde geçirilen 32-nji Halkara küşt festiwalynda üstünlikli çykyş edip, Open A kategoriýasynda birinji orny eýeledi.

15–24-nji awgust aralygynda geçirilen ýaryşda Aşgabat şäheriniň 22 ýaşly küştçüsi mümkin bolan 9 utukdan 8 utuk toplap, bäsdeşlerinden öňe saýlandy. Ol ýaryşa 2184 FIDE reýtingi bilen ýedinji belgili türgen hökmünde gatnaşyp, has ýokary reýtingli we tejribeli küştçüleriň arasynda ýokary netijäni görkezdi.

Şirliýew ýaryşyň jemleýji sanawynda Siriýadan halkara ussasy Başir Aýti we Filippinlerden Riçiliu III Salcedo ýaly güýçli garşydaşlardan öňe geçdi. Abu-Dabidäki bu üstünlik türkmen küştçüsiniň halkara reýtingine hem oňyn täsir edip, onuň reýtingine 40,6 utuk goşulmagyna mümkinçilik berdi.

Halkara küşt festiwaly Abu-Dabi küşt kluby tarapyndan guralyp, dünýäniň dürli ýurtlaryndan güýçli küştçüleri bir ýere jemledi. Şol günlerde geçirilen Masters ýaryşynda hem dünýäniň belli grossmeýsterleri, şol sanda Daniil Dubow, Dawid Parawýan we Pa Inýan çykyş etdiler.

Allaýar Şirliýewiň Abu-Dabidäki ýeňşi Türkmenistanyň küşt mekdebiniň soňky döwürde gazanýan üstünlikleriniň nobatdaky beýany boldy. Awgust aýynda Mumbaýda geçirilen ýetginjekleriň arasynda Aziýa çempionatynda Lala Şöhradowa rapid boýunça altyn, blis boýunça kümüş medal gazanypdy. Mundan ozal Türkmenistanyň ýygyndysy Gyrgyzystanda geçirilen Merkezi we Demirgazyk Aziýa çempionatynda rekord derejede 16 medal eýelemegi başarypdy.

Abu-Dabide gazanylan ýeňiş türkmen küştüniň halkara meýdançadaky abraýynyň barha ýokarlanýandygyny we ýaş türgenleriň ýokary derejeli ýaryşlarda üstünlikli çykyş edýändigini ýene bir gezek görkezdi.