«Türkmenistan» awiakompaniýasy Dubaý we Abu-Dabi gatnawlaryny wagtlaýynça bes etdi
«Türkmenistan» awiakompaniýasy Birleşen Arap Emirlikleri ugry boýunça amala aşyrylýan birnäçe howa gatnawlaryna wagtlaýyn çäklendirme girizdi. Resmi maglumata görä, Aşgabat — Dubaý — Aşgabat we Aşgabat — Abu-Dabi — Aşgabat ugurlary boýunça guralýan yzygiderli uçuşlar 2026-njy ýylyň 1-nji iýunyna çenli wagtlaýynça togtadyldy.
Awiakompaniýanyň ýolbaşçylygy bu çäräniň sebitdäki durnuksyz ýagdaýlar, has takygy, Eýran Yslam Respublikasynyň howa giňişliginde girizilen täze çäklendirmeler bilen baglydygyny düşündirdi. Gatnawlaryň wagtlaýyn ýatyrylmagy ilkinji nobatda ýolagçylaryň we ekipaž agzalarynyň howpsuzlygyny doly üpjün etmek maksady bilen amala aşyryldy.
Gatnawlary wagtlaýyn saklanan ýolagçylar üçin awiakompaniýa ýeňillikli şertleri hödürleýär. Satyn alnan awiabiletleriň bahasyny hiç hili jerime ýa-da goşmaça tutum we göterim tölegsiz dolulygyna yzyna alyp bolar. Şeýle hem, islege görä, biletleriň senesini soňraky iň ýakyn we amatly uçuş günlerine mugt üýtgetmek mümkinçiligi döredildi.
