Türkmenistanyň energetika wekiliýeti Ispaniýada innowasion tehnologiyalary öwrenýär
Türkmenistanyň Energetika ministrliginiň hem-de Döwlet energetika institutynyň hünärmenlerinden ybarat bolan wekiliýet Ispaniýanyň Barselona şäherinde guralan iki günlük okuw-tanyşlyk saparyna gatnaşdy. Ýewropanyň howpsuzlyk we hyzmatdaşlyk guramasynyň (ÝHHG) Aşgabatdaky merkezi tarapyndan guralan bu çäre gaýtadan dikeldilýän energetika pudagynyň durnuklylygyny ýokarlandyrmaga we innowasion tehnologik çözgütleri ornaşdyrmakda ýewropa tejribesini özleşdirmäge gönükdirildi.
Saparyň ilkinji gününde türkmen hünärmenleri Kataloniýanyň politehnik uniwersitetiniň meşhur Gözleg merkezinde (CITCEA-UPC) boldular. Ispaniýaly kärdeşleri bilen geçirilen çuňňur hünär durnuklylygy baradaky maslahatlarda energetika geçişini meýilleşdirmegiň döwrebap gurallary we ýüze çykyp biljek tehnologik töwekgelçiliklere taýýarlyk meseleleri ara alnyp maslahatlaşyldy.
Esasanam, gaýtadan dikeldilýän energiýa çeşmelerini döwrebap intellektual torlara (Smart Grids) utgaşdyrmagyň amaly taraplary türkmen hünärmenlerinde aýratyn gyzyklanma döretdi. Bu ulgam energiýanyň sarp edilişini we paýlanyşyny awtomatiki usulda, has tygşytly dolandyrmaga mümkinçilik berýär.
ÝHHG-niň Aşgabatdaky merkeziniň ykdysady-ekologiýa bölüminiň başlygy Oliwra Zurowak-Kuzman bu taslamanyň esasy maksadynyň türkmen hünärmenleriniň hünär derejesini ýokarlandyrmakdan we Türkmenistanyň Döwlet energetika institutynyň akademiki mümkinçiliklerini has-da giňeltmekden ybaratdygyny aýratyn belledi.
Okuw saparynyň ikinji gününde wekiliýet Kataloniýanyň politehnik uniwersitetiniň ýanyndaky Wodorody barlamak baradaky ýöriteleşdirilen merkeziniň bilermenleri bilen duşuşdy. Iki taraply duşuşyklarda häzirki zaman megapolisleriň (iri şäherleriň) energetika durnuklylygyny üpjün etmek hem-de «akylly» şäherlerde energiýa sarp edilişini innowasion usullar bilen dolandyrmak boýunça giňişleýin pikir alyşmalar boldy.
Mundan başga-da, senagat elektronikasynyň we energiýa üpjünçiliginiň bökdençsizligini kepillendirýän täze ylmy çemeleşmelere seredildi. Barselonada öwrenilen bu innowasion tehnologiýalar we öňdebaryjy ylmy tejribeler Türkmenistanda bar bolan energetika düzümlerini döwrebaplaşdyrmak boýunça amala aşyrylýan milli maksatnamalar üçin örän uly amaly ähmiýete eýedir.
