Gazagystanyň Aktau şäherinde WKF görnüşindäki karate boýunça geçirilýän Merkezi Aziýanyň XI çempionatynyň ilkinji güni Türkmenistanyň ýygyndysy üçin üstünlikli tamamlandy. Ýurdumyzyň türgenleri ýaryşyň ilkinji gününde 1 altyn, 1 kümüş we 2 bürünç medal gazanyp, jemi 4 medala eýe boldular.

Üç gün dowam etjek halkara çempionata Eýrandan, Gazagystandan, Gyrgyzystandan, Täjigistandan, Türkmenistandan we Özbegistandan 500-e golaý türgen gatnaşýar. Türgenler ýaşlaryň, ýetginjekleriň we ulularyň arasynda kata (tehniki hereketleriň toplumy) hem-de kumite (tutluşyk) ugurlary boýunça medallar ugrunda güýç synanyşýarlar.

Türkmenistanyň Karatedo federasiýasynyň habar bermegine görä, ýurdumyzyň ýygyndysy çempionata 36 türgen, 4 tälimçi, 6 emin we 1 resmi wekil bilen gatnaşýar.

Ilkinji ýaryş gününde türkmen karateçileri ähli medallaryny kata ugry boýunça gazandylar.

14 ýaşa çenli oglanlaryň arasynda Mary welaýatynyň Baýramaly şäherindäki 18-nji orta mekdebiň 7-nji synp okuwçysy Muhammetresul Haýrullaýew ähli garşydaşlaryndan üstün çykyp, altyn medalyň eýesi boldy.

16–17 ýaşly ýetginjekleriň arasynda Aşgabat şäherindäki 52-nji ýöriteleşdirilen orta mekdebiň 11-nji synp okuwçysy Allanur Ýalkabow üstünlikli çykyş edip, kümüş medala mynasyp boldy.

10–11 ýaşly türgenleriň arasynda Mary welaýatynyň Baýramaly şäherindäki 6-njy orta mekdebiň 5-nji synp okuwçysy Musa Gurbanow hem-de şol şäheriň 11-nji orta mekdebiniň 4-nji synp okuwçysy Şirmuhammet Garymyradow bürünç medallary gazandylar.

Merkezi Aziýanyň XI çempionaty dowam edýär we Türkmenistanyň ýygyndysy öňdäki ýaryş günlerinde hem medal gaznasyny artdyrmagy maksat edinýär.