«TurkmenTextile Expo 2026» halkara sergisinde Italiýanyň iň öňdebaryjy tehnologiýalary görkeziler
Şu ýylyň 4–6-njy iýuny aralygynda Aşgabat şäherinde geçiriljek «TurkmenTextile Expo 2026» halkara pudaklaýyn sergisinde Italiýanyň giň gerimli milli ekspozisiýasy ýaýbaňlandyrylar. Italiýanyň Ilçihanasynyň, Italiýanyň Söwda agentliginiň hem-de Dokma enjamlaryny öndürijiler assosiasiýasynyň goldamagynda gurallýan bu resmi italýan pawilýony, Aşgabat meýdançasynyň iri dünýä maýadarlary we agyr senagatyň esasy müşderleri üçin möhüm hünär merkezine öwrülendigini görkezýär.
Halkara serginiň çäklerinde türkmen hünärmenleri we daşary ýurtly wekiller häzirki zaman dünýä modasynyň hem-de dokma önümçiliginiň standartlaryny kesgitleýän brendleriň tejribesi we enjamlary bilen ýakyndan tanyşmaga mümkinçilik alarlar. Italýan pawilýonynyň düzüminde dünýäniň dokma maşyn gurluşyk pudagynda öňdebaryjy orunlary eýeleýän şu aşakdaky iri kompaniýalar öz önümlerini tanyşdyrar:
- Marzoli — egirme enjamlary pudagynda dünýäniň iň abraýly markalarynyň biri;
- Savio — egirme proseslerini awtomatlaşdyrmak boýunça halkara lider kompaniýa;
- Itema — täze nesliň ýokary tehnologiýaly dokma stanoklaryny öndüriji;
- Stalam — çig mallary ýokary ýygylykda işläp taýýarlamak usullaryny hödürleýän meşhur marka;
- Mesdan — önümleriň hiline doly gözegçilik we barlaghana synaglary boýunça dünýä derejesindäki bilermen;
- Color Service — boýag prosesleriniň awtomatlaşdyrylmagyny we robotlaşdyrylan dozalaşdyryş ulgamlaryny görkezjek kompaniýa.
Bu dünýä belli brendler Türkmenistanyň dokma senagatyna sanly takyklyk, energiýa tygşytlylygy we ekologiýa taýdan arassalygy utgaşdyrýan häzirki zaman inženerçilik çözgütlerini hödürlärler.
«TurkmenTextile Expo 2026» sergisi tebigy süýümleri çuň gaýtadan işlemekden başlap, taýýar egin-eşik, aýakgap, öý dokma önümleriniň önümçiligine, şeýle hem ýörite ätiýaçlyk şaýlaryny we himiki serişdeleri üpjün etmäge çenli ähli ugurlary öz içine alar. Aşgabatda geçiriljek bu gözden geçiriliş Türkmenistanyň çalt ösýän dokma senagatynyň eksport mümkinçiliklerini görkezmek, täze halkara şertnamalary baglaşmak we sebit senagatynyň strategik geljegini ara alyp maslahatlaşmak üçin möhüm halkara meýdança bolar.
