Üns beriň: Bellenilmedik ýerlerde söwda we hyzmatlar üçin jerimeler ýokarlandyryldy
Türkmenistanyň kanunçylygynda söwda we hyzmatlar ulgamyna degişli administratiw jogapkärçilik güýçlendirilýär. Türkmenistanyň Prezidenti Serdar Berdimuhamedow tarapyndan 2026-njy ýylyň 11-nji aprelinde gol çekilen täze Kanun esasynda, Administratiw hukuk bozulmalary hakynda kodeksiň 322-nji maddasyna möhüm üýtgetmeler girizildi.
Kabul edilen bu üýtgetmeler we goşmaçalar 2026-njy ýylyň 1-nji maýyndan başlap resmi taýdan güýje girer. Şol seneden başlap, bellenilmedik ýerlerde söwda edýänler täze jerime möçberleri we çäreleri bilen ýüzbe-ýüz bolarlar.
Kanunçylykda aşakdaky ýerlerde elden alma söwdasyny etmek ýa-da hyzmatlary hödürlemek administratiw hukuk bozulmasy hasaplanýar:
- Köçelerde we meýdanlarda;
- Ýaşaýyş jaýlarynyň howlularynda;
- Jaýlaryň girelgelerinde (podyezdlerinde);
- Söwda we hyzmatlar üçin ýörite bellenilmedik beýleki ýerlerde.
Täze üýtgetmelere görä, bellenilmedik ýerlerde söwda edýänlere aşakdaky administratiw çäreleriň biri ulanylyp bilner:
- Duýduryş berilmegi.
- Harytlaryň muzdsuz alynmagy: Hukuk bozulmanyň obýekti bolan närseleriň (harytlaryň) döwlet haýryna geçirilmegi.
- Pul jerimesi: Binýatlyk mukdaryň 0,5 böleginden 1-ne çenli (indi jerime 50 manatdan 100 manada çenli bolar).
Ýurdumyzda administratiw jerimeleri hasaplamak üçin ulanylýan binýatlyk mukdar 100 manada deňdir. Bu bolsa, raýatlaryň täze kanunçylyk talaplaryna eýerip, söwda işlerini diňe bellenilen bazarlarda we söwda merkezlerinde amala aşyrmagynyň ähmiýetini has-da artdyrýar.
