Türkmenistanyň Magtymguly adyndaky Ýaşlar guramasynyň Merkezi geňeşi, Bilim ministrligi hem-de Türkmenistanyň Senagatçylar we telekeçiler partiýasynyň Merkezi geňeşi «Ýaş inžener — 2026» atly bäsleşigi yglan etdiler.

Jemgyýetçilik guramalarynyň merkezi binasynda geçiriljek bäsleşik dört ugur boýunça guralar. Olar «BattleBots – Mini» («Robotlaryň göreşi»), «Mission» («Wezipeleri ýerine ýetirmek»), «Erjeller kodlaýar» we «Ýangyna garşy» atly ugurlary öz içine alýar.

«BattleBots – Mini» ugrunda gatnaşyjylar özleriniň taýýarlan robotlaryny ýaryşdyryp, garşydaşynyň robotyny hatardan çykarmaga ýa-da ony ýaryş meýdançasyndan çykarmaga synanyşarlar.

«Mission» ugry boýunça robotlar tennis toplaryny ýygnap, bellenilen ýerlere eltmeli bolarlar. «Erjeller kodlaýar» bäsleşiginde bolsa ýaşlar «Scratch» programmirleme dilinde döreden oýunlaryny, animasiýalaryny we beýleki sanly taslamalaryny görkezerler. «Ýangyna garşy» ugry ýangynyň öňüni almak we ony söndürmek boýunça işlenip taýýarlanan taslamalara bagyşlanar.

Bäsleşigiň käbir ugurlaryna 7–12-nji synplaryň okuwçylary gatnaşyp bilerler. «BattleBots – Mini» ugry boýunça bolsa ýokary okuw mekdepleriniň talyplary özara bäsleşerler.

Bäsleşige gatnaşmak isleýänler 2026-njy ýylyň 20-nji noýabryna çenli hasaba alynmalydyrlar. Gatnaşyjylaryň ýol, naharlanmak we ýaşamak bilen bagly çykdajylary özleri tarapyndan üpjün edilmelidir.

Bäsleşik barada goşmaça maglumat almak üçin +993 61 862766 telefon belgisine ýüz tutup bolýar.