Ynsanperwerlik kerweni: Özbegistanyň Eýrana kömegi Türkmenistanyň üsti bilen ýetirildi
Özbegistan Respublikasy tarapyndan Eýran Yslam Respublikasyna niýetlenip ugradylan lukmançylyk ynsanperwer kömeginiň täze tapgyry bellenen ýerine üstünlikli ýetirildi. Bu gezekki ynsanperwer kerweniniň üstaşyr (tranzit) ugry Türkmenistanyň çäklerinden geçdi.
Lukmançylyk maksatly gymmatly ýük türkmen-eýran serhedinde ýerleşýän «Artyk — Lütfobod» halkara gözegçilik-geçiriş nokadynda resmi taýdan garşylandy we eýran tarapyna gowşuryldy.
Sebitdäki ynsanperwer hyzmatdaşlygyň aýdyň nusgasy bolan bu kerwen jemi 15 sany uly ýük awtoulagyndan ybarat boldy. Degişli kömegiň düzüminde dürli derman serişdeleri, şeýle hem saglygy goraýyş ulgamynda zerur bolan ýöriteleşdirilen lukmançylyk önümleri we enjamlary bar. Ýüki gowşurmak mynasybetli serhetýaka zolagynda resmi dabara guraldy. Oňa sebitiň diplomatik we dolandyryş edaralarynyň wekilleri işjeň gatnaşdylar.
Çärede Özbegistanyň we Eýranyň Türkmenistandaky ilçileri, şeýle hem Eýranyň dürli döwlet, sebit we gümrük-saglygy goraýyş edaralarynyň ýolbaşçy wekilleri we jogapkär işgärleri duşuşdylar. Çykyş edijiler sebitara gatnaşyklaryň we özara goldawyň ähmiýetini belläp, bu ynsanperwerlik çäresiniň guralmagynda üstaşyr geçiş mümkinçiliklerini üpjün eden Türkmenistanyň eýeleýän ornuna hem aýratyn ünsi çekdiler. Ýükleriň bökdençsiz barmagy, goňşy ýurtlaryň arasyndaky logistika we serhet gatnaşyklarynyň ýokary derejededigini ýene bir gezek subut etdi.
