Qozog‘istonda davlat tili mustahkamlanmoqda

Qozog‘istonning yangi Konstitutsiyasi loyihasida qozoq tili aniq va ravshan tarzda davlat tili sifatida mustahkamlandi. «Kazinform» axborot agentligining xabar berishicha, bu haqda Qozog‘iston Respublikasi Prezidenti huzuridagi Strategik tadqiqotlar instituti direktori Jandos Shaymardanov Konstitutsiyaviy islohotlar bo‘yicha komissiya majlisida ma’lum qildi. U bir qator fuqarolar Asosiy Qonunda davlat tilining maqomi haqidagi masalaga e’tibor qaratganlarini qayd etdi. «Ammo yangi Konstitutsiya loyihasida qozoq tilining aniq va ravshan tarzda davlat tili sifatida mustahkamlangandini ta’kidlash juda muhimdir», dedi Shaymardanov. Eslatib o‘tsak, 31-yanvar kuni Konstitutsiyaviy islohotlar bo‘yicha komissiya Qozog‘istonning yangi Konstitutsiyasi loyihasini jamoatchilikka taqdim etgan edi. Yangi Asosiy Qonunning birinchi loyihasi muqaddima (Preambula), 11 bo‘lim va 95 moddadan iborat. O‘zgartirish va qo‘shimchalar Konstitutsiya matnining 84 foiziga daxldordir. Islohotlarning asosiy yo‘nalishlariga bir palatali parlament — Qurultoyga o‘tilishi, vitse-prezident lavozimining joriy etilishi va Xalq Kengashi (Halk Geňeşi) tuzilishi kiradi. Qozog‘iston Respublikasi unitar davlat bo‘lib qoladi, boshqaruv shakli esa Prezidentlik Respublikasi deb belgilandi.