Turkmaniston va Buyuk Britaniya ilm-fan va madaniyat sohalarida hamkorlikni kengaytirmoqda

Birlashgan Qirollikka amalga oshirilgan tashrif dasturi doirasida Turkmaniston Tashqi ishlar vaziri Rashid Meredov boshchiligidagi Turkmaniston delegatsiyasining London universitet kolleji (UCL) Arxeologiya instituti professori Timoti Uilyams bilan uchrashuvi bo‘lib o‘tdi. Uchrashuv yakunlari bo‘yicha Turkmaniston Madaniyat vazirligi va UCL Arxeologiya instituti o‘rtasida Kelishuv imzolandi. Bu haqda Turkmaniston TIV sayti xabar bermoqda.

Suhbat davomida Turkmaniston tomoni Timoti Uilyamsning Turkmaniston arxeologik merosini, xususan, qadimiy Marvni o‘rganish va saqlashga qo‘shgan ko‘p yillik hissasini alohida ta’kidladi.

Birgalikdagi ilmiy tadqiqotlarning ahamiyati hamda muzey-ko‘rgazma hamkorligini rivojlantirish zarurligi qayd etildi.

Uchrashuv yakunlari bo‘yicha Turkmaniston Madaniyat vazirligi va UCL Arxeologiya instituti o‘rtasida hamkorlikni yanada kengaytirish, qo‘shma ekspeditsiyalarni tashkil etish, ilmiy tadqiqotlarni rivojlantirish hamda mutaxassislarni tayyorlashga qaratilgan Kelishuv imzolandi.