Hormatly Prezidentimiziň Özbegistana döwlet sapary: Dostluk we hyzmatdaşlyk nyşany
16–17-nji noýabrda hormatly Prezidentimiziň Özbegistan Respublikasyna amala aşyran döwlet sapary iki ýurduň arasyndaky dostluk we hyzmatdaşlyk gatnaşyklarynyň täze ugurlara eýe bolýandygyny aýdyň görkezdi. Saparyň çäklerinde il-ýurt bähbitli iri taslamalaryň başyny tutmak bilen, Daşoguz — Şabat serhetýaka söwda merkeziniň işe girizilmegine-de rugsat berildi.
Geografik taýdan ýakyn, dili we däp-dessurlary bilen biri-birine baglanyşykly türkmen we özbek halklarynyň taryhy gatnaşyklary bu saparyň ähmiýetini has-da artdyrdy.
Habarçymyz Türkmenabatda ýaşaýan özbek maşgalalarynyň biri bilen söhbetdeş boldy. Maşgalabaşy Kurbanbaý aga ömrüniň 76 ýyllygyny belleýärkä, maşgalasynyň agzybirligi we sagdynlygy bilen bu günki gün bagtyýar ýaşap gelýändigini aýtdy:
— Men köp ýyllap Türkmenabadyň tikin fabriginde işledim. Häzir maşgalam bilen bagtyýar, agzybir ýaşap ýörüs. Ogullarymyz, gelinlerimiz, agtyklarymyz — hemmesi zähmetkeş we ynsanperwer. Hormatly Prezidentimiziň we Arkadagly Serdarymyzyň alyp barýan işleriniň netijesinde iki ýurduň arasyndaky dostluk we hyzmatdaşlyk has-da güýçlenýär. Biz şeýle bagtyýar döwri başdan geçirýändigimiz üçin buýsançlydyrys, — diýip, Kurbanbaý aga gürrüň berdi.
Söhbetdeşlikde maşgalanyň çagalarynyň sagdynlygy, terbiýesi we bagtyýar durmuşy aýratyn üns bilen bellenildi. Olaryň aýtmagyna görä, täze açylan söwda merkezleri we taslamalar maşgalalaryň gündelik durmuşyna gönüden-göni oňyn täsir edýär we ykdysady gatnaşyklary giňeldýär.
Bu saparlar türkmen-özbek halklarynyň dostlukly gatnaşyklaryny we özara ynanyşygyny has-da berkitýär. Daşoguz — Şabat serhetýaka söwda merkeziniň işe girizilmegi, geljekde Farap — Olat serhetýakasynyň açylmagy iki ýurduň arasyndaky ykdysady gatnaşyklary ösdürmekde möhüm ädim bolup durýar.
Hormatly Prezidentimiziň we Arkadagly Gahryman Serdarymyzyň ynsanperwer syýasaty, türkmen-özbek halklarynyň arasyndaky dostluk we bagtyýar durmuş ugrunda alnyp barylýan işleri dogrudan-da giň gerimli netijeler bilen görkezýär.
