Milli Baýramçylyga Mynasyp Zähmet Üstünlikleri
Eziz Diýarymyzda milli baýramlarymyz zähmet üstünlikleri bilen mynasyp garşylamak Berkarar döwletiň täze eýýamynyň Galkynyşy döwrüniň asylly däbine öwrüldi. Türkmenabat galla önümleri kärhanasynyň işçi-hünärmenleri hem bu asylly ýörelgä eýerip, ýurdumyzyň hemişelik Bitaraplygynyň 30 ýyllyk baýramyny zähmet ýeňişlerine besleýärler.
Berkarar Watanymyzda azyk bolçulygynyň üpjün edilmegine mynasyp goşant goşýan bu döwrebap kärhanada birinji we ýokary hilli unlaryň, şeýle-de bugdaý ýarmasynyň hem-de kepeginiň önümçiligi üstünlikli ýola goýlup, ýylyň-ýylyna ýokary netijeler gazanylýar. Bu ýerde 100 müň tonna dänäni saklamaga mümkinçilik berýän elewator bolup, kärhananyň ýyllyk kuwwaty 80 müň tonna bugdaý ununy öndürmäge niýetlenilendir.
— Halkara parahatçylyk we ynanyşmak ýylynda güneşli Diýarymyzda giňden bellenilýän şanly sene — Halkara Bitaraplyk gününe, hemişelik Bitaraplygymyzyň 30 ýyllyk baýramyna zähmet üstünliklerimiz bilen barýarys. Ýanwar — oktýabr aýlarynyň görkezijileri boýunça kärhanamyzda 129 million 294 müň manatlyk önüm taýýarlanylyp, meýilnama 101,2 göterim berjaý edildi. Degişli döwürde önümçilikde ösüş depgini 117,4 göterime ýetirildi. Jemi kärhanada 38 müň 706 tonna un öndürilip, şondan 12 müň 838 tonnasy ýokary hilli, 25 müň 868 tonnasy hem birinji hilli unlardyr. Bellenilen meýilnama 100 göterim amala aşyrylyp, önümçilikde ösüş depgini 102,2 göterime deň boldy. Şeýle-de ýylyň başyndan bäri bu ýerde bugdaý many ýarmasynyň 95 tonnasy taýýarlanylyp, meýilnama 100 göterim ýerine ýetirildi. Degişli döwürde kepegiň 11 müň 774 tonnasy öndürilip, meýilnama 103,2 göterim berjaý edildi. Önümçilik ösüş depgini hem 102 göterimden gowrak boldy — diýip, kärhananyň ykdysadyçysy, kärdeşler arkalaşygynyň ilkinji guramasynyň başlygy Göwher Awezowa buýsanç bilen gürrüň berdi.
Galla önümleri kärhanasynda önümçilige goýberilýän bugdaýyň, şeýle-de öndürilýän un önümleriniň hili aýratyn üns merkezinde saklanylýar. İşine ökde hünärmenleriň gaýraty bilen dünýäniň ösen döwletleriniň kämil enjamlary bilen üpjün edilen barlaghanada galla hasylynyň çyglylygy, hil derejesi hasaba alynýar, himiki düzüminiň seljermesi geçirilýär. Şonuň ýaly-da taýýarlanylan hamyryň hil ölçegleri öwrenilýär.
— Kärhanamyzda önümçiligiň yzygiderliligi kämil daşary ýurt enjamlarynyň sazlaşykly işine daýanýar. Elewator-dan goýberilen galla arassalanylar. Çyglandyrylan bugdaý 24 sagadyň dowamynda saklanandan soň önümçilige taýýarlanylýar. Çyglandyrmak önümçilikde azyklyk bugdaýyň daşky gabygyny ýumşadylmagy üçin zerur. Soňra ýene bir gezek gaýtadan arassalanylyp, degirmene goýberilýär. Taýýarlanylan un önümleri hiliň derejesine görä gaplaýjy bölümde haltalara gaplanylýar. Gazanan üstünliklerimizde kärhanamyzyň her bir işçi-hünärmeniniň mynasyp paýy bar. Şeýle-de işlerimiziň ilerlemeginde çalşyk ussalary Ata jan Açylowyň, Merdan Hudaýkulyýewiň, Şakir Ýagmurowyň, Azamat Rozumbaýewiň, Kemal Hakberdiýewiň, zähmeti goramak we tehniki howpsuzlyk boýunça baş hünärmen Alişer Awezowyň, elektromontýor Semender Hojabaýewiň, slesar Agamyrat Narmamedowyň, elektrogaz kebşirleýji Kamiljan Aýdogdyýewiň, ýangyn söndüriji nobatçy Nuryagdy Allakowyň, ýükçüler Azamat Abdyýewiň, Suhrap Röwşenowyň, ýarmaçy Suhrap Joraýewiň, operatorymyz Eziz Sultanowyň goşandy has-da uludyr — diýip, Türkmenabat galla önümleri kärhanasynyň baş inženeri Bahtýar Hazratow ýürekli arzuwlaryny beýan etdi.
Biz ýurdumyzda azyk bolçulygynyň üpjün edilmegine saldamly goşant goşýan bu öňdebaryjy kärhananyň işçi-hünärmenlerine täze zähmet üstünliklerini arzuw edýäris.
