«Ylmy intellektual eýeçilik hakynda Türkmenistanyň Kanuny» güýje girdi

Türkmenistanyň Prezidenti Serdar Berdimuhamedow «Ylmy intellektual eýeçilik hakynda Türkmenistanyň Kanunyna» gol çekdi. Kanun ylmy intellektual eýeçiligiň obýektleri döredilende we peýdalanylanda ýüze çykýan gatnaşyklary düzgünleşdirýär we ylmy intellektual eýeçiligiň obýektlerine eýeçilik hukugynyň goralyp saklanylmagynyň üpjün edilmegine gönükdirilendir.

Bu ýerde yl­my in­tel­lek­tual eýe­çi­li­giň ob­ýekt­le­ri hökmünde döredilişiniň maksatlaryna, häsiýetli aýratynlyklaryna, mazmunyna, beýan edilişiniň görnüşlerine baglylykda monografiýalar, dissertasiýalar, ylmy nutuklar, ylmy makalalar, ylmy hasabatlar, şeýle hem görkezilen eserleriň obýektlerinden gelip çykýan ylmy-usulyýet gollanmalary, annotasiýalar, referatlar we ylmy intellektual eýeçiligiň gaýtadan işlenen beýleki obýektleri kesgitlenilýär.

Resminama ylmy intellektual eýeçilik çygrynda ýüze çykýan gatnaşyklary düzgünleşdirýär, ylmy intellektual eýeçiligiň obýektlerine bolan awtorlyk hukuklaryň görnüşlerini kesgitleýär we şol obýektlerden peýdalanylanda hukuklaryň goralmagyny özünde jemleýär. Onuň hereketi ylmy işiň barşynda ýüze çykýan ylmy intellektual eýeçiligiň netijesi bolan kompýuterler üçin programmalar, maglumatlar binýady, oýlap tapyşlar, peýdaly modeller, senagat nusgalary, seleksiýanyň gazananlary, integral mikroshemalaryň topologiýasy, täjirçilik syrlary bolup durýan obýektleriň döredilmegi bilen bagly gatnaşyklara degişli däldir.

Kanun ýurdumyzyň merkezi neşirlerinde dolulygyna çap edildi.