Türkmenistan BAE we Aýlag ýurtlaryna gurluşyk materiallarynyň eksportyny artdyrmakçy
Türkmenistanyň gurluşyk we binagärlik ministri Abdulla Geldiýew Birleşen Arap Emirlikleriniň hökümet wekilleri, “dmg events” kompaniýasynyň ýolbaşçylary we daşary ýurtly gurluşyk hem-de inženerçilik kompaniýalarynyň ýolbaşçylary bilen birnäçe duşuşyklary geçirdi. Taraplar Türkmenistanyň gurluşyk meteriallarynyň BAE hem-de Aýlag ýurtlaryna eksportyny ösdürmegi maslahatlaşdylar.
Duşuşyklar Dubaý şäherinde “Big 5 Global 2025” halkara sergisiniň çäginde geçirildi. Taraplar sanly we inženerçilik çözgütleri hem-de beýleki ugurlar boýunça hyzmatdaşlygy ösdürmegiň mümkinçiliklerini ara alyp maslahatlaşdylar. Bu barada çarşenbe güni TEF habar berdi.
Abdulla Geldiýew “Big 5 Global 2025” sergisindäki çykyşynda Türkmenistanyň gurluşyk pudagynyň ösdürilmeginde ähmiýet berilýän esasy ugurlar, hususan-da durnukly şäher ösüşi, infrastrukturanyň döwrebaplaşdyrylmagy hem-de halkara ülňüleriniň ornaşdyrylmagy barada belläp geçdi.
Türkmen wekiliýeti çäräniň dowamynda Saud Arabystanynyň, Türkiýäniň we Hytaýyň milli pawilýonlaryna baryp, energiýa tygşytlaýjy tehnologiýalar, “akylly şäher” ulgamlary we döwrebap infrastruktura boýunça täze çözgütler bilen tanyşdy.
Çärä gatnaşýan daşary ýurt kompaniýalary Awazada geçirilen “CIET 2025” sergisiniň netijelerine ýokary baha berdiler. Türkmen tarapy hyzmatdaşlary noýabr aýynda meýilleşdirilen pudaklaýyn çäre - “CIET 2026” sergisine gatnaşmaga çagyrdy.
“BIG 5 Global 2025” - dünýäniň gurluşyk pudagy boýunça iň iri halkara sergileriniň biridir. Sergi Dubaý şäherinde geçirilýär we häzirki zaman gurluşygy üçin täze materiallary, inženerçilik çözgütlerini hem-de sanly tehnologiýalary hödürleýän öndürijileri, gurluşykçylary we tehnologik kompaniýalary bir ýere jemleýär.
