«Wirtual aktiwler hakynda» Türkmenistanyň Kanuny kabul edildi
2026-njy ýylyň 1-nji ýanwaryndan ýurdumyzda «Wirtual aktiwler hakynda Türkmenistanyň Kanuny» güýje girer. Kanun «Türkmenistan» gazetiniň şu günki sanynda dolulygyna çap edildi.
Bu Kanun Türkmenistanda wirtual aktiwleriň döredilmegi, goýberilmegi, saklanylmagy, ýerleşdirilmegi, ulanylmagy we dolanyşygy babatda ýüze çykýan gatnaşyklary düzgünleşdirýär hem-de olaryň hukuk, ykdysady we guramaçylyk esaslaryny kesgitleýär. 8 bapdan hem-de 43 maddadan ybarat bolan resminama wirtual aktiwler çygrynda Türkmenistanyň kanunçylygyny dolulygyna belleýär. Bu ugurda işiň döwlet düzgünleşdirmesiniň esasy ýörelgelerini tassyklaýar.
Resminama milli ykdysadyýetimiziň ähli pudaklaryny sanly ulgamyň mümkinçilikleri bilen utgaşykly ösdürmekde netijeli işleri alyp barýan Watanymyzda ulgamyň kanunçylyk binýadyny pugtalandyrmagyň ýolundaky ähmiýetli ädimleriň möhüm tapgyrydyr.
