Daşoguzda täze durmuş-medeni maksatly desgalar işjeň gurulýar
Ýurdumyzyň köp şäherleri ýaly, Daşoguzda hem döwrebap şäher gurşawy ýokary depginde döredilýär. Köne binalardan boşadylan ýa-da boş duran ýer böleklerinde dürli maksatly täze desgalaryň gurulmagy gysga wagtyň içinde şäher çägini özgertmäge mümkinçilik berdi.
Şol bir wagtyň özünde, Şagadam, Görogly, Al-Horezmi ýaly köçeleriň ugurlarynda, ýa-da şäherden Halkara howa menziline barýan awtomobil ýolunyň ugrunda ýerleşýän, uly meýdany we ösen infrastrukturasy bolan täze öz-özüňi üpjün edýän ýaşaýyş toplumlarynyň, şol sanda iri ýaşaýyş jaýlar toplumynyň döredilmegi hereket edýän inženerçilik ulgamlarynyň mümkinçiliklerinden hem oýlanyşykly peýdalanmaga ýardam berdi.
Soňky ýyllarda ýaşaýyş jaýlarynyň gurluşygy bilen bir hatarda, durmuş-medeni maksatly desgalaryň ulgamy hem ep-esli ösüşe eýe boldy, bu bolsa ilata edilýän dürli hyzmatlaryň möçberini artdyrmaga we welaýat merkeziniň dürli künjeklerinde ilatyň ýaşaýyş şertleriniň amatlylygyny ýokarlandyrmaga mümkinçilik berdi.
Şäherdäki ähli täze binalar dürli maliýeleşdiriş çeşmeleriniň hasabyna gurulýar, şunda olaryň töweregindäki ähli çäkler doly abadanlaşdyrylýar we yşyklandyrylýar. Täze ilatly toplumlaryň gurluşygy şu ýyl hem işjeň dowam etdirilýär. Şeýlelikde, döwrebap şäher gurluşygynyň iri taslamalarynyň biri hökmünde, häzirki wagtda Zaman köçesiniň ugrunda gurulýan, amatlylygy ýokarlandyrylan köp sanly ýedi gatly ýaşaýyş jaýlaryndan ybarat täze ýaşaýyş toplumyny görkezmek bolar.
Şäheriň günorta bölegi aýratyn ýokary depginler bilen gurulýandygyny bellemek gerek. Görogly etrabyna barýan awtomobil ýolunyň ugrunda soňky ýyllarda kottej görnüşli köp sanly ýekebara ýaşaýyş jaýlary, birnäçe köp otagly ýaşaýyş jaýlary, hususy söwda merkezleri guruldy, täze döwrebap mekdep we çagalar bagy gurulýar. Bu bolsa gurluşygyň toplumlaýyn häsiýete eýe bolýandygyna, şäher giňişligini oýlanyşykly guramaga, ýaşaýyş jaýlary bilen durmuş-medeni maksatly desgalaryň arasynda dogry utgaşdyrmaga çalyşýandygyna şaýatlyk edýär.
