Türkmenistandan eksport edilýän azyk önümleriniň möçberi 2025-nji ýylda 30 göterim ýokarlandy. Bu döwürde Türkmenistandan 263 müň tonnadan gowrak azyk önümleri eksport edildi. Bu barada Türkmenistanyň Döwlet gümrük gullugy sişenbe güni habar berdi.

Häzirki wagtda Türkmenistan ýyladyşhanalarda ýetişdirilýän pomidory eksport etmek boýunça sebitde öňdebaryjy orny eýeleýar. Şoňa görä-de, geçen ýyl boýunça 181 müň tonnadan gowrak ter pomidor eksport edilip, bu görkeziji 2024-nji ýyl bilen deňeşdirilende 21 göterim ýokarlandy.

Bulardan başga-da, 2025-nji ýylda gök önümleriniň we ter miweleriň eksporty 5 göterim, gaplanan azyk önümleriniň eksporty 3 göterim, konditer önümleriniň eksporty 123 göterim, alkogolsyz içleriň eksporty 282,6 göterim ýokarlandy. Şeýle hem, geçen ýylda 6 müň tonna golaý iýmitlik towuk ýumurtgasy we 26 müň tonna golaý azyklyk däneli ekinler eksport edildi.

Habarda bellenilişi ýaly, Türkmenistanyň Döwlet gümrük gullugy döwlet serhediniň gözegçilik-geçiriş nokatlarynda ýurtdan eksport edilýän azyk önümleri ileri tutma tertibinde resmileşdirmek işlerini amala aşyrýar. Bu bolsa, azyk önümleriniň ahyrky sarp edijilere gysga wagtda we bökdençsiz daşalmagynda has-da ähmiýetli bolup durýar.

Türkmenistanyň Döwlet gümrük gullugy hususy önüm öndürijiler bilen yzygiderli iş duşuşyklary geçirip, gümrük kanunçylygy we olara girizilýän üýtgetmeler hem-de goşmaçalar, daşary ykdysady işine gatnaşyjylar üçin döwrüň ösýän talaplaryna laýyk gelýän hyzmatlaryň täze görnüşleri barada hukuk kömegini berýärler.