Abdulla Babaýew «Fight Nights 134» ýaryşynda Inal Hasbulatow bilen tutluşyk geçirer

20-nji fewralda — anna güni Soçi şäheri garyşyk söweş sungaty (MMA) dünýäsiniň iň gyzykly wakalarynyň merkezine öwrüler. «RED ARENA» köpugurly meýdançasynda «FIGHT NIGHTS 134» ýaryşy geçiriler. Onuň çäginde Türkmenistanyň iň geljegi uly söweşijileriniň biri Abdulla Babaýew özüniň ýeňişli rekordyny goramak üçin nobatdaky gezek oktagona çykar.

Ýeňil agram derejede janköýerlere diýseň çekeleşikli tutluşyk garaşýar. Abdulla Babaýew (5-0) russiýaly söweşiji Inal Hasbulatow (8-3) bilen güýç synanyşar.

Bu söweş Babaýewiň professional karýerasyna ähmiýetli tutluşyklaryň biri hökmünde girer. Yzygiderli bäş ýeňiş gazanan türkmen türgeni özüni pälwanlyk binýadyny we güýçli urgy tärlerini birleşdirýän uniwersal söweşiji hökmünde tanatdy.

Muňa garamazdan, Hasbulatow hem ýeňil garşydaş däl. Russiýaly türgeniň professional derejede 11 söweş geçirendigi ony Babaýewiň şu wagta çenli ýüzbe-ýüz bolan pälwanlarynyň arasynda iň kyn we howply garşydaşa öwürýär.

Janköýerler üçin maglumat:

Söweş agşamyny «UDAR» telekanaly göni ýaýlymda görkezer.

Senesi: 20-nji fewral (anna güni).

Geçirilýän ýeri: Soçi, RED ARENA.

Ýaýlymyň başlanýan wagty: Aşgabat wagty bilen 20:00-da.