"Arkadag" futbol kluby 2025-nji ýylda dördünji baýragy – Türkmenistanyň Kubogyny aldy

"Arkadagly" futbolçylar ilkinji gezek yzly-yzyna dört ýeňiş gazandylar. Olar finalda ýurduň wise-çempiony we AFK Çempionlar ligasynyň ýaryşlaryna iki gezek gatnaşan "Ahal" toparyny 2:1 hasabynda utmak bilen, AFK Çagyryş ligasyndaky ýeňşiniň, milli birinjilik ugrundaky ýaryşda alan altyn medallarynyň we Superkubogyň üstüne Türkmenistanyň Kubogyny hem goşdular.

Ähmiýeti boýunça ikinji orunda durýan milli klub baýragy ugrundaky ýaryşyň final oýny taryhda ikinji gezek Arkadag şäherinde, hyryn-dykyn doly 10,000 orunlyk stadionda geçirildi.

Türkmenistanyň Kubogyny eýýäm dört gezek gazanan "Ahal" üçin bu ýaryşyň taryhyndaky dokuzynjy, 2023-nji ýylyň aprel aýynda döredilen "Arkadag" üçin bolsa üçünji final boldy.

Pellehana barýan ýolda "Ahal" iki duşuşygyň jemi boýunça ilki "Köpetdagy" 3:2 hasabynda ýeňdi (öz meýdanynda – 2:2, myhmançylykda – 1:0), soň bolsa hut şu hasap bilen (myhmançylykda 1:2, öz meýdanynda –2:0) "Şagadamy" utdy. “Arkadag” çärýek finalda Balkanabadyň “Nebitçi” toparyny 9:1 hasabynda derbi-dagyn etdi (öz meýdanynda – 6:0, garşydaşyňkyda – 3:1), ýarym finalda bolsa “Aşgabady” 7:2 hasabynda (myhmançylykda 3:1, öz meýdanynda –4:1) ynamly ýeňdi.

Kubok oýnundan öň “Arkadag” bilen “Ahal” şu möwsümde bäş gezek duşuşdy. Bäş oýnuň hemmesinde-de “Arkadag” ýeňiş gazandy: Türkmenistanyň çempionatynda 3:1, 3:0, 4:1 we 1:0, şeýle hem Türkmenistanyň Superkubogynda 3:0.

Şuňa çenli toparlaryň ikisiniň-de Türkmenistanyň şondan öňki iki Kubok finalynda duşuşandygyny, şonda “Arkadagyň” 2023-nji ýylda 3:0 we 2024-nji ýylda 1:0 hasabynda ýeňiş gazanandygyny belläp geçmelidiris.

Häzirki kubok oýnunda “Ahalyň” tälimçileri, dürli sebäplere görä, ýakynda AFK-2 Çempionlar Ligasynyň myhmançylykda geçiren oýnunda Iordaniýanyň “Al-Husseýn” toparyna garşy oýnan ýedi oýunçysy kem bolan topary esasy düzüminde çykarmadylar. Eýsem-de bolsa, muňa garamazdan, “Türkmennebitönümleri” toparynyň ýaş oýunçylary ikinji ýarymyň ortalaryna çenli 0:1 hasabynda utulyp barýan Türkmenistanyň häzirki çempionyna garşy mynasyp garşylyk görkezdiler. 24-nji minutda “Ahal” toparynyň gapdal hüjümçisi Magtymberdi Berenow çep ganatdaky Berdimyrat Rejepowdan arany açdy we jerime meýdançasyna girip, Ýakupmuhammet Gowşudowa ajaýyp suratda pas berdi, ol bolsa topy çep aýagy bilen ýüzugra derwezäniň aşaky sag burçuna gönderdi.

“Arkadag” 67-nji minutda Resul Hojaýewe garşy jerime meýdançasynda düzgün bozulandygy üçin berlen jerime urgusy arkaly hasaby deňledi. On bir metrlik jerime urgusyny Şamämmet Hydyrow amala aşyrdy. Şonda emin Berdimämmet Atdyýew arkasyndan itekländigi üçin, “Ahal” toparynyň goragçysy, derwezeçi bilen ýüzbe-ýüz bolan R. Hojaýewi gol salmak mümkinçiliginden mahrum eden Selim Omarowy meýdançadan çykardy.

Azlykda galan "Ahal" tizden ikinji goly-da geçirdi. Ony 77-nji minutda 23 metr aralykdan derwezäniň ýokarky çep burçuna Şamämmet Hydyrow ajaýyp urgy bilen derwezä saldy, şeýtmek bilen-de, iki sany ýeňiş goluny öz hasabyna ýazdy.

Ötüp barýan 2025-nji ýyl "Arkadag" üçin diýseň üstünlikli boldy. Maý aýynda Türkmenistanyň ilkinji "akylly" şäherinden bolan bu futbol kluby finalda Kambojanyň "Prea Han Riç Swaý Rieň" klubyny 2:1 hasabynda ýeňip, Aziýa klublarynyň üçünji iň ýokary kubogy bolan AFK-2024/25 Çagyryş Ligasynyň Kubogyny gazandy. Sentýabr aýynda Wladimir Baýramowyň topary Super Kubogy gazandy, şondan soň olar üçünji gezek wagtyndan öň ýurt çempiony adyny gazandylar. Indi bolsa yzly-yzyna üçünji ýyl Türkmenistanyň Kubogyny gazandylar.