Aşgabada synag üçin getirilen täze «Yutong» awtobusy şäher ýollarynda hereket edýär

Ilkinji synag maksady bilen Aşgabada getirilen, uzynlygy 12 metr bolan döwrebap «Yutong» kysymly sowadyjyly ýolagçy awtobusy şu günler paýtagtyň şaýollarynda synagdan geçirilýär. Bu barada «Watan» habarlar gepleşiginde habar berildi.

Awtobusuň aýratynlyklary:

• Uzynlygy: 12 metr

• Gapy sany: 3

• Hereketlendirijisi: Ekologik taýdan arassa, «Euro 5» ölçeglerine laýyk gelýär

• Töleg ulgamy: Sanly ulgam arkaly amala aşyrylýar

• Ýolagçy hasaby: Münýän we düşýän ýolagçylary awtomatiki hasaplaýan abzallar bilen üpjün edilen

• Sowadyjy enjam: Içinde ýolagçylar üçin klimat ulgamy bar

• Gözegçilik ulgamy:

  • 10 sany wideokamera

  • JPS ulgamy

  • Sürüjiniň işine we ulagyň hereketine gözegçilik edýän intellektual ulgam

Ýolagçylar üçin goşmaça amatlylyklar:

• Ses we şekil ulgamy

• Wi-Fi router

• El telefonlaryny zarýadlaýjy enjamlar

• Mümkinçiligi çäkli ýolagçylar üçin niýetlenen ýerler

• Duralgalary habar berýän awtomatiki enjam

Bu täze awtobus synagdan üstünlikli geçse, Aşgabadyň jemgyýetçilik ulag ulgamyna goşulyp, paýtagtymyzyň ýaşaýjylaryna hyzmat eder.

Ýatlatsak, 10-njy ýanwarda geçirilen Ministrler Kabinetiniň mejlisinde Türkmenistanyň Prezidenti Serdar Berdimuhamedow degişli Karara gol çekipdi. Şol karara laýyklykda, Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentligine, Hytaý Halk Respublikasynyň «Yutong Bus Сo.,Ltd.» kompaniýasy bilen 700 sany «Yutong ZK6128HG» kysymly awtobusy satyn almak boýunça şertnama baglaşmaga ygtyýar berildi.