Döwletjan Ýagşymyradow PFL Belfast ýaryşynda Taýson Pedro bilen söweşer

Garyşyk söweş sungaty (MMA) boýunça türkmen pälwany Döwletjan Ýagşymyradow 16-njy aprelde Demirgazyk Irlandiýanyň Belfast şäherindäki «SSE Arena» arenasynda geçiriljek PFL Belfast ýaryşynda awstraliýaly Taýson Pedro bilen duşuşar. Uruş ýarym agyr agram derejesinde bolar.

Liganyň reýtinginde Ýagşymyradow häzirki wagtda ikinji orny eýeleýär, Pedro bolsa sekizinji setirde dur. Awstraliýaly türgen üçin bu tutluşyk PFL-däki ilkinji söweşi bolar. Ozal ol UFC-de çykyş edýärdi.

Türkmen pälwany özüniň soňky söweşini 2025-nji ýylyň oktýabr aýynda PFL Champions Series 3 ýaryşynyň çäklerinde geçiripdi. Şonda ol titul söweşinde amerikaly Kori Andersondan eminleriň biragyzdan beren çözgüdi bilen ýeňlipdi. Häzirki wagtda türkmen söweşijisiniň hasabynda 25 ýeňiş, sekiz ýeňliş we bir deňme-deňlik bar.

Pedro soňky gezek 2024-nji ýylyň martynda UFC Fight Night 238 ýaryşynda gözenege çykypdy. Şol duşuşykda ol Witor Petrinodan eminleriň biragyzdan beren çözgüdi bilen ýeňildi. Onuň hasabynda on ýeňiş we bäş ýeňliş bar.

Ýagşymyradow mundan ozal ACB we ACA guramalarynyň çempiony boldy, 2024-nji ýylda bolsa ýarym agyr agramda PFL-iň Gran-prisiniň ýeňijisi boldy.