“Türkmenistanyň geljegine maýa goýumlar” (IFT 2026) atly halkara forumyna gatnaşmak üçin arzalaryň kabul edilmegi dowam etdirilýär. Bu çäre şu ýylyň 18-nji martynda Aşgabat şäherinde geçirilip, daşary ýurtly maýa goýujylar bilen Türkmenistanyň hususy pudagynyň wekilleriniň arasynda hyzmatdaşlyk üçin meýdança hökmünde hyzmat eder.

Işewürlik maksatnamasy senagat, oba hojalygy, gurluşyk, logistika we innowasion taslamalary öz içine alýar. Foruma GDA ýurtlaryndan, Ýewropadan, Türkiýeden, Günorta-Gündogar Aziýadan, Demirgazyk Ýewropadan, şeýle hem Demirgazyk we Günorta Amerikadan wekilleriň gatnaşjakdygy tassyklanyldy.

Çärä ýüzlerçe işewürlik wekilleriniň gatnaşmagyna garaşylýar. Şol bir wagtyň özünde, çäräniň çäkli görnüşde geçirilmegi netijeli B2B (işewürleriň arasynda) duşuşyklaryny we anyk gepleşikleri geçirmäge mümkinçilik döreder.

Hasaba alyş IFT 2026 forumynyň resmi web sahypasy arkaly amala aşyrylýar. Foruma gatnaşmaga isleg bildirýän taraplar guramaçylyk meseleleri we gatnaşmagyň şertleri boýunça “TMT Consulting” kompaniýasynyň toparyna ýüz tutup bilerler.