Murad Özbekbaýewyň Andreas Ýan bilen duşuşygy, 2026-njy ýylyň ýanwary, Frankfurt, Germaniýa

Türkmenistan bilen Germaniýa özara işewürlik saparlaryny guramak meselelerini ara alyp maslahatlaşdylar. Bu mesele Türkmenistanyň Germaniýa Federatiw Respublikasyndaky konsuly Murad Özbekbaýew bilen German türkmen forumynyň başlygy, Germaniýanyň kiçi we orta telekeçilik kärhanalarynyň Federal bileleşiginiň (BVMW) ýerine ýetiriji direktory Andreas Ýanyň arasynda geçirilen gepleşikleriň dowamynda seredildi.

Duşuşygyň dowamynda taraplar iki ýurduň hususy pudaklarynyň arasynda hyzmatdaşlygy giňeltmegiň mümkinçiliklerine garadylar. Şeýle hem uzak möhletli hyzmatdaşlygy ösdürmekde ykdysady diplomatiýanyň we telekeçileriň arasyndaky göni gatnaşyklaryň ähmiýeti bellenildi. Bu barada Türkmenistanyň resmi metbugaty penşenbe güni habar berdi.

Türkmen tarapy ýokary tehnologiýalar we innowasiýalar ulgamlarynda nemes orta kärhanalarynyň tejribesine gyzyklanma bildirdi. Nemes işewür toparlary bolsa, Türkmenistanyň durnukly we geljegi uly hyzmatdaş hökmünde çykyş edýändigini, hususan-da, gaýtadan işleýän senagat we logistika ýaly ugurlarda uly mümkinçilikleriniň bardygyny bellediler.

Gazanylan ylalaşyklary durmuşa geçirmek boýunça amaly işleri 2026-njy ýylyň mart aýynda Aşgabat şäherinde dowam etdirmek meýilleşdirilýär. Germaniýanyň işewür toparlarynyň wekilleri Türkmenistanyň Senagatçylar we telekeçiler birleşmesiniň döredilmeginiň 18 ýyllygyna bagyşlanan sergi we maslahatyna, şeýle hem “IFT 2026” Halkara maýa goýum forumyna gatnaşmaga çagyryldy.

BVMW Germaniýanyň 900 müňden gowrak kiçi we orta kärhanalaryny birleşdirýär hem-de dünýäniň 85 ýurdunda wekilhanalara eýe bolup, daşary ýurtlarda işleýän kompaniýalara giň goldawlary berýär.