Türkmenistanda sanly ykdysadyýeti ösdürmegiň täze döwri: 2026–2028-nji ýyllar üçin Döwlet maksatnamasy

«Türkmenistanda sanly ykdysadyýeti ösdürmegiň 2026 — 2028-nji ýyllar üçin Konsepsiýasynda» göz öňünde tutulan wezipeleriň amala aşyrylmagyny üpjün etmek, sanly ulgamlary giňden ornaşdyrmak arkaly ýokary tehnologiýaly, bäsdeşlige ukyply sanly ykdysadyýeti ösdürmek maksady bilen, Türkmenistanyň Prezidentiniň Kararyna laýyklykda, «Türkmenistanda sanly ykdysadyýeti ösdürmegiň 2026 — 2028-nji ýyllar üçin Döwlet maksatnamasy» hem-de ony amala aşyrmak boýunça ýerine ýetirilmeli çäreleriň meýilnamasy tassyklanyldy. Olaryň çäklerinde telekommunikasiýa infrastrukturasyny döwrebaplaşdyrmak we häzirki zaman aragatnaşyk tehnologiýalaryny ornaşdyrmak boýunça iri taslamalar amala aşyrylar. Hususan-da, «Altyn Asyr» öýjükli aragatnaşyk operatorynyň dolandyryş we ygtyýarlyk ulgamlaryny giňeltmek, şeýle hem Aşgabat şäherinde we «Awaza» milli syýahatçylyk zolagynda bäşinji nesil aragatnaşyk tehnologiýasyny (5G) ornaşdyrmak meýilleşdirilýär. Şol bir wagtyň özünde welaýat we etrap merkezlerini, şäherleri 4G+ standartly aragatnaşyk bilen üpjün etmek, şeýle hem 4G torlarynyň gurşawyny giňeltmek göz öňünde tutulýar. Ilatyň we ykdysadyýetiň dürli pudaklaryna degişli guramalaryň internet hyzmatlaryna bolan isleginiň artýandygyny, şeýle hem sanly platformalaryň we elektron hyzmatlaryň işjeň ornaşdyrylýandygyny nazara alyp, hereket edýän internet infrastrukturasynyň enjamlaýyn tehniki toplumlarynyň kuwwaty artdyrylar.