Aşgabatda geçirilen çagalar we ýetginjekleriň arasynda küşt boýunça halkara ýaryş tamamlandy. «Kids Expo Chess Cup 2026» atly bäsleşigiň netijeleri boýunça Türkmenistanyň ýygyndysy medal sanawy boýunça birinji orny eýeledi. Ýerli küştçüler iki günlük ýaryşda jemi 24 medal, şol sanda 7 altyn, 9 kümüş we 8 bürünç medal gazandylar.

Ýaryş Türkmenistanyň Söwda-senagat edarasynyň sergi merkezinde «Kids Expo: çagalar üçin ähli zat» atly halkara sergi-ýarmarkasynyň çäklerinde geçirildi. Bäsleşigi Türkmenistanyň Söwda-senagat edarasy, Türkmenistanyň Küşt federasiýasy, Halkara mekdep küşt federasiýasy, Türk Küşt assosiasiýasy, Freedom Asian Chess Initiatives maksatnamasy we TurkmenExpo kompaniýasy bilelikde gurady.

«Küstiň bilim ulgamyndaky ýyly — 2026» atly FIDE başlangyjynyň çäklerinde geçirilen ýaryşa Azerbaýjandan, Eýrandan, Gazagystandan, Gyrgyzystandan, Täjigistandan, Türkiýeden, Özbegistandan we Türkmenistandan jemi 94 ýaş küştçi gatnaşdy. Olar 8, 10 we 12 ýaşa çenli ýaş toparlarynda 12 medal toplumynyň ugrunda bäsleşdiler.

Ýaryşyň ilkinji gününde rapid görnüşinde 7 tapgyr, ikinji gününde bolsa blits görnüşinde 9 tapgyr geçirildi. Duşuşyklar Halkara küşt federasiýasynyň (FIDE) resmi düzgünleri esasynda guralyp, gatnaşyjylaryň halkara reýtingleri hem hasaba alyndy.

Ýaryşyň esasy netijeleri we ýeňijiler

Bäsleşigiň jemi boýunça Türkmenistanyň ýygyndy topary 7 altyn, 9 kümüş we 8 bürünç – jemi 24 medal bilen ýaryşyň lideri boldy.

Medal gazanan ýurtlaryň sanawy aşakdaky ýaly boldy:

  • 2-nji orun: Eýran (4 altyn medal)

  • 3-nji orun: Gazagystan (1 altyn we 3 bürünç medal)

  • 4-nji orun: Özbegistan (2 kümüş we 1 bürünç medal)

  • 5-nji orun: Azerbaýjan (1 kümüş medal)

Ýaryşda aýratyn netijeler bilen tapawutlanan küştçüleriň hem bolandygy bellenilýär. Eýranyň wekili Kiýaşa Mahbubi 10 ýaşa çenli oglanlaryň arasynda rapidde-de, blitsde-de ähli duşuşyklary ýeňip, 16 oýunda 16 utuk toplady. Ol iki günüň dowamynda ýekeje gezek hem deňme-deň oýnamady.

12 ýaşa çenli ýaş toparynda Eýranyň küştçüsi Sadra Roşantab hem-de Türkmenistanyň wekili, FIDE-niň zenan kandidat ussasy (WCM) Dilber Hupbuýewa «altyn dubly» amala aşyrdylar. Olar rapid we blits görnüşleriniň ikisinde-de birinji orny eýelediler.

Türkmenistanyň wekilleri aýratyn-da kiçi ýaş toparlarynda ýokary netijeleri görkezdiler. Rapid görnüşinde 8 ýaşa çenli gyzlaryň arasynda Laçyn Isaeýewa birinji, Bähar Jumaýewa ikinji, Çynar Pirkulýewa üçünji boldy. 10 ýaşa çenli gyzlaryň arasynda Bagul Jumaýewa altyn medal gazandy. 12 ýaşa çenli gyzlaryň arasynda bolsa WCM Dilber Hupbuýewa ýeňiji boldy.

Blitsde 8 ýaşa çenli oglanlaryň arasynda Begmurat Agamämmedow birinji, Hangeldi Myradow ikinji orny eýeledi. 8 ýaşa çenli gyzlaryň arasynda Nazly Kaka­geldiýewa ýeňiji boldy. 10 ýaşa çenli gyzlaryň arasynda Selbi Arslаnowa, 12 ýaşa çenli gyzlaryň arasynda bolsa Dilber Hupbuýewa birinji orna mynasyp boldy.

Bäsleşikde käbir ýaş toparlarynda birmeňzeş utuk gazanan türgenleriň arasynda ýeňijileri goşmaça görkezijiler kesgitledi. Hususan-da, 8 ýaşa çenli oglanlaryň rapid ýaryşynda Zakariýa Amirow, Kerim Babaýew we Hangeldi Myradow 6 utukdan topladylar. Şeýle ýagdaý 8 ýaşa çenli gyzlaryň arasynda hem bolup, Laçyn Isaeýewa bilen Bähar Jumaýewa 5,5 utuk bilen deň netije görkezdi.

«Kids Expo Chess Cup 2026» resmi ýaryş maksatnamasynyň tamamlanmagy bilen Aşgabatdaky küşt çäreleri hem bes edilmeýär. Serginiň soňky iki gününde ChessFest atly giň gerimli küşt festiwaly geçirilýär. Oňa şäheriň ýaşaýjylary we myhmanlary gatnaşyp, köpçülikleýin küşt oýunlaryna goşulyp, ussatlaryň ussatlyk sapaklaryna gatnaşyp hem-de erkin görnüşde küşt oýnap bilerler.

Aşgabatda şeýle halkara çagalar küşt ýaryşlarynyň geçirilmegi Türkmenistanyň ýaş küştçüleriniň tejribesini artdyrmak, halkara bäsleşiklerde özlerini görkezmek we ýaşlaryň arasynda küşt sportunyň ösdürilmegi üçin täze mümkinçilikleri döredýär.