Türkmenistanyň 23 ýaşa çenli erkekler we zenanlar ýygyndylary Singapurda geçirilýän FIBA 3x3 U23 Nations League 2026 halkara ýaryşyna üstünlikli başladylar. Türkmenistanyň wekilleri ilkinji duşuşyklarynda Kataryň ýygyndylaryndan ynamly üstün çykdylar. Erkekler topary 15:9 hasabynda ýeňiş gazanan bolsa, zenanlar ýygyndysy 21:6 hasabynda uly tapawut bilen ýeňiş gazandy.

Duşuşyklar ýaryşyň ilkinji tapgyrynyň «B» toparçasynda geçirildi. Bu toparçada Türkmenistanyň we Kataryň ýygyndylaryndan başga-da Awstraliýanyň topary çykyş edýär. «A» toparçasynda bolsa Singapur, Saud Arabystany we Bahreýn ýygyndylary bäsleşýär. Ähli toparlar Asia West/Pacific konferensiýasynyň çäginde çykyş edýärler.

Türkmenistanyň erkekler ýygyndysynyň düzüminde Döwlet Narmyradow, Baýramdurdy Geldiýew, Roman Seleznýow, Baky Gurbanow we Alyjan Begjanow çykyş edýärler. Topara Ýewgeniý Nazipow ýolbaşçylyk edýär. Zenanlar ýygyndysynyň düzüminde Jennet Hajymämmedowa, Ranajan Ýakubowa, Mariýa Salmina, Farangiz Saidowa we Maral Merdanowa bar. Zenanlar toparynyň baş tälimçisi Mährijemal Jumageldiýewa.

FIBA 3x3 U23 Nations League 2026 ýaryşy 20–26-njy awgust aralygynda Singapurda geçirilýär. Asia West/Pacific konferensiýasynda Türkmenistanyň, Awstraliýanyň, Singapuryň, Saud Arabystanynyň, Kataryň we Bahreýniň ýygyndylary çykyş edýär. Bäsleşik birnäçe tapgyrdan ybarat bolup, konferensiýanyň ýeňijisi umumy netijeler boýunça kesgitlenýär.

Ýaryşyň netijesi Türkmenistanyň ýygyndylary üçin aýratyn ähmiýete eýe. Sebäbi Asia West/Pacific konferensiýasynda birinji orny eýeleýän topar FIBA 3x3 U23 dünýä çempionatyna göni gatnaşmaga hukuk gazanar. Dünýä çempionaty 15–19-njy sentýabrda Hytaýyň Hubeý welaýatynda geçiriler.

Türkmenistanyň ýaş basketbolçylarynyň Katara garşy gazanan ilkinji ýeňişleri olaryň ýaryşdaky çykyşyna üstünlikli başlangyç berdi. Ýygyndylaryň öňünde indi konferensiýanyň galan tapgyrlarynda hem netijeli çykyş edip, dünýä çempionatyna gatnaşmak üçin göreşi dowam etdirmek wezipesi durýar.