Hytaýyň «Xiaomi» tehnologiýa kompaniýasy Pariž şäherinde geçirilen halkara tanyşdyrylyş dabarasynda «Xiaomi 18 Pro» we «Xiaomi 18 Pro Max» smartfonlarynyň dünýä bazary üçin niýetlenen görnüşlerini görkezdi.

Bu modeller ilkinji gezek 2026-njy ýylyň sentýabr aýynda Hytaýda tanyşdyrylypdy. Halkara görnüşleri esasy tehniki aýratynlyklary boýunça Hytaý bazaryndaky nusgalaryna meňzeş bolsa-da, akkumulýatorlarynyň sygymy peseldildi. Şeýle-de täze enjamlaryň halkara bazaryndaky bahalary Hytaýdaky bahalaryndan ep-esli ýokary boldy.

Halkara bazarynda «Xiaomi 18 Pro» smartfonynyň başlangyç bahasy 1 400 ýewro, «Xiaomi 18 Pro Max» modeliniňki bolsa 1 600 ýewro möçberinde kesgitlenildi. Hytaýda «Xiaomi 18 Pro» 6 000 ýuandan (takmynan 900 dollar), «Xiaomi 18 Pro Max»-yň dury görnüşi bolsa 7 000 ýuandan (takmynan 1 050 dollar) satylýar.

Täze smartfonlaryň halkara we Hytaý görnüşleriniň arasyndaky esasy tapawutlaryň biri akkumulýatorlaryň sygymydyr. «Xiaomi 18 Pro»-nyň Hytaý üçin niýetlenen görnüşinde 7 000 mAh sygymly akkumulýator ulanylan bolsa, global görnüşinde bu görkeziji 6 000 mAh-a deňdir. «Xiaomi 18 Pro Max»-da bolsa akkumulýatoryň sygymy degişlilikde 8 500 mAh-dan 7 050 mAh-a çenli peseldildi.

Şol bir wagtyň özünde, zarýad beriş mümkinçilikleri saklanyp galýar. «Xiaomi 18 Pro» 90 W kuwwatly simli we 50 W kuwwatly simsiz zarýad beriş tehnologiýalaryny goldaýar. «Xiaomi 18 Pro Max» modelinde bolsa bu görkezijiler degişlilikde 100 W we 50 W deňdir.

Smartfonlar öndürijiligi bilen hem tapawutlanýar. «Xiaomi 18 Pro» Qualcomm kompaniýasynyň Snapdragon 8 Elite Gen 6 prosessory, «Xiaomi 18 Pro Max» bolsa Snapdragon 8 Elite Extreme Gen 6 prosessory bilen enjamlaşdyryldy. Iki model hem Android 17 operasion ulgamynyň esasynda işleýän HyperOS 4 interfeýsini ulanýar.

Enjamlaryň ýene bir aýratynlygy — yzky panelinde ýerleşdirilen goşmaça ekran. Mundan başga-da, iki smartfon hem «Leica» kompaniýasy bilen hyzmatdaşlykda taýýarlanan, 200 megapikselli datçikleri öz içine alýan kamera ulgamy bilen üpjün edildi.

«Xiaomi 18 Pro Max» modeli gara, ak, goýy gyzyl we kosmos gögi reňklerinde hödürlenýär. Onuň ýat mümkinçilikleri 12 GB operatiw we 256 GB içerki ýatdan başlap, 16 GB operatiw hem-de 1 TB içerki ýada çenli bolan görnüşleri öz içine alýar. «Xiaomi 18 Pro» bolsa 12 GB operatiw ýatly, 256 GB we 512 GB içerki ýat görnüşlerinde elýeterlidir.

«Xiaomi» kompaniýasy täze smartfonlaryň halkara bazarynda satuwa çykaryljak anyk senesini häzirlikçe mälim etmedi.