Türkmen grossmeýsteri Türkiýede geçen halkara ýaryşyň ýeňijisi boldy
9—15-nji noýabr aralygynda Türkiýäniň Mersin şäherinde Mersiniň häkimliginiň IX Halkara küşt ýaryşy geçirildi. Şweýsar usulynda geçirilen ýaryşa 19 ýurtdan 360 küştçi gatnaşdy.
Ýaryşlar dört derejede guralyp, iň ýokary «A» derejede ildeşimiz, halkara grossmeýster Meýlis Annaberdiýew (FIDE reýtingi – 2407) ajaýyp ýeňiş gazandy. Ol ýokary taýýarlygyny görkezip, mümkin bolan 9 utukdan 7 utuk toplady. Meýlis 5 ýeňiş gazandy we ilkinji bäşlige girýän garşydaşlary bilen 4 oýny deňme-deň tamamlady.
«A» derejesiniň baýrak eýeleri:
Meýlis Annaberdiýew (Türkmenistan)
Halkara ussat Araş Tahbaz (Eýran, 2468) – 9-dan 7 utuk
Halkara grossmeýster Arian Golami (Eýran, 2468) – 9-dan 6,5 utuk
Bellemeli zat, birinji ýeriň ykbalyny goşmaça koeffisiýent boýunça kesgitlemeli boldy we Meýlisiň görkezijisi has ýokary geldi.
Birinji belgide goýlan azerbaýjanly grossmeýster Wugar Rasulow (2525) ýaryşy 5-nji orunda tamamlandy.
